«Nazarbaev Ýnıversıtetine» oqýǵa tikeleı túsýdiń jańa erejeleri jasaldy
ASTANA. 5 naýryz. QazAqparat - «Nazarbaev Ýnıversıteti» 2012 jyly stýdentterdi bakalavrıat baǵdarlamasyna tikeleı, Foundation baǵdarlamasynan tys, qabyldaı bastaıdy,
dep habarlady Ýnıversıtettiń Atqarýshy keńesi tóraǵasynyń orynbasary Qadısha Daıyrova Pm.kz saıtyna.
«Biz Foundation baǵdarlamasynan tys, bakalavrıat baǵdarlamasyna tikeleı oqýǵa túsýdiń jańa erejelerin ázirledik. Atap aıtqanda, aǵymdaǵy jyly oqýǵa tikeleı túsý jáne basqa oqý oryndarynan aýysý is-sharalary qarastyrylyp otyr, tikeleı oqýǵa túsetin jáne aýysyp keletin stýdentter úshin 50-ge jýyq oryn josparlanýda», - dedi Qadısha Daıyrova.
Qazirgi tańda «Nazarbaev Ýnıversıtetine» oqýǵa túsetindermen maqsatty daıyndyqtar júrgizilýde. Talapkerlerdiń kóbisi qazirdiń ózinde aǵylshyn tili boıynsha IELTS, TOEFL sertıfıkattaryna ıe.
«2012 jyly biz daıyndyq kýrsyna 500 adam qabyldaımyz. Qańtar aıynyń sońynda jaǵdaı boıynsha 4 myńnan astam ótinish qabyldanyp otyr, al olardyń 2 myńǵa jýyǵy aǵylshyn tili boıynsha dıagnostıkalyq test (VSERT) tapsyrdy», - dep atap kórsetti Qadısha Daıyrova.
Naýryz-sáýir aılarynda ótetin kelesi kezeńde talapkerler pánder boıynsha SET testin tapsyrady. Bul emtıhan University College London (UCL) oqý ornymen seriktestikke júrgiziledi.
«Al maýsym aıynyń sońynda biz iriktelgen barlyq talapkerlerdiń aldyn-ala sany men olardyń balldaryn biletin bolamyz. Shilde aıynda qabyldaý komıssııasymen birlesip barlyq materıaldardy zerdeleý jumystary bastalady», - dedi Q.Daıyrova.
Oqý ornynyń aqparaty boıynsha, oqýǵa ótinish berip otyrǵan úmitkerlerdiń 21,8 paıyzy - astanalyqtar bolsa, 18,7 paıyzy -almatylyqtar, 8 paıyzy - Ońtústik Qazaqstan oblysynyń talapkerleri.
