Nazarbaev Ýnıversıtetine bilimińdi dáleldeı alsań ǵana túsesiń - Prezıdent
«Bıyl bilim mınıstrligi memlekettik granttardy bólýde kóp bylyqqa jol berdi. Memlekettik grantqa ilikken balalar ony ala almaı qaldy. Odan keıin Bilim mınıstrligi «Altyn belgisi» bar 200 balanyń grantyn alyp qoıyp, olardy medıtsınalyq ýnıversıtetterdiń esebinen oqytamyz dep ýáde berdi. Jeme-jemge kelgende «Altyn belgi» ıegerleri ózderi tańdaǵan mamandyqqa túse almady. Odan qaldy ózderi tańdaǵan aımaqqa bara almaı veterınar boldy, basqa aımaqqa ketti. Jalpy depýtattardyń ózderi Bilim mınıstrligi bıylǵy bilim granttaryn zańǵa qaıshy bóldi deýde. Siz osydan habardarsyz ba?», - dep suraǵan edi BAQ ókilderi Elbasynan.
«Nege olaı boldy? Granttar alý úshin tıisti ball bolýy kerek qoı. Tıisti ball almaǵannan keıin anaý dep, mynaý dep shyǵa kelemiz. Solaı bilimdi bola ma? Ár adam óziniń bilimine saı ótýi kerek. Myna Nazarbaev Ýnıversıtetine túsem degen jyl saıyn 10 myń adam aryz beredi. 10 myń adamnyń kóp degende 450-500-i ǵana túse alady. Ol jerge eshkim aralasa almaıdy. Basqaryp otyrǵan japonnyń azamaty. Bizde adambyz ǵoı, maǵan da týǵan-týystarym, dostarym kelip: «Myna jerde otyrsyń ǵoı aıta salsańshy» deıdi. Men ol jerde Katsý degen kisi bar, sonymen sóıles», deımin de qoıamyn», - dep kúldi Elbasy.
Sonymen qatar Qazaqstan Prezıdenti ǵylym men bilimge kelgende qatal, talapshyl bolýymyz kerektigin aıtty.
«Bilimimen túsetin bolsa sonda sońynda kele jatqan, mektepte otyrǵan balalar «oqýǵa túsý úshin naǵyz bilim kerek eken ǵoı», dep oılanady. Zańdy buzǵan bolsa qaraımyz. Zańdy túrge keltiremiz. Zańdy buzbaǵan bolsa ótken balalar grantty alýy kerek. Ótpegenderi almaıdy. Basqa da sharýa bar ǵoı. Dúnıede eldiń barlyǵy ýnıversıtet bitirip júrgen joq. Álem halqynyń 2 protsentiniń joǵary bilimi bar. Qazir dúnıeniń jartysy saýatsyz», - dedi QR Prezıdenti.