Nazarbaev ýnıversıtetine 12 memleketten 2468 talapker tirkeldi
ASTANA. 12 qańtar. QazAqparat - Nazarbaev ýnıversıtetine 2012 jylǵa 2468 talapker tirkeldi. Qazaqstanmen qosa rezıdent elderdiń tizimine taǵy 11 memleket kirdi. Ýnıversıtet saıtynda 2011 jylǵy 9 qarashada bastalǵan tirkeý 2012 jylǵy 30 qańtar kúni tún ortasynda bitedi.
Bilim ordasy baspasóz qyzmetiniń habarlaýynsha, ótinimder Qazaqstannyń barlyq aımaqtarynan jáne basqa elderden kelip jatyr. Tirkelgen kandıdattardyń 21,5 paıyzyn - astanalyqtar, 18,9 paıyzyn - almatylyqtar, 8 paıyzǵa jýyǵyn - ońtústikqazaqstandyqtar quraıdy. Sonymen qosa, 21 suranym AQSh, Aljır, Armenııa, Aýǵanstan, Qyrǵyzstan, Qytaı, Mońǵolııa, Nıgerııa, Ózbekstan, Reseı Federatsııasy men Frantsııa elderinen tústi.
Tańdaǵan fakýltterdiń tiziminde Gýmanıtarlyq jáne áleýmettik ǵylymdar mektebi (pándik emtıhandar: matematıka jáne synı turǵydan oılaý), Injenerııa mektebi (matematıka jáne fızıka), Ǵylym jáne tehnologııalar mektebi (matematıka jáne fızıka) birinshi oryn alyp otyr. 2468 talapkerdiń 1297-si - qyz, 1171-i - jigit.
«Nazarbaev ýnıversıteti esterińizge salady: Ýnıversıtet 2012 jyly Foundation baǵdarlamasy boıynsha oqytý júrgizbeı-aq, bakalavrıat baǵdarlamasyna tikeleı oqýǵa qabyldaıdy. Osy talapkerlerdi qabyldaý erejeleri men onlaın-tirkeý jańa jylda ýnıversıtet saıtynda ashylady. 2011 jyly Nazarbaev ýnıversıtetine 4247 talapker tirkeldi, olardyń 501-i stýdent atanyp, aǵymdaǵy jyldyń kúzinde oqýlaryn bastady. 2012 jylda Nazarbaev ýnıversıtetiniń Foundation baǵdarlamasynda oqýǵa Qazaqstan azamattaryna elimizde taǵy 500 memlekettik grant bólinýde», - delingen baspasóz habarlamasynda.
