«Nazarbaev Ýnıversıtetinde» Joǵary bilim berý mektebi ashylady
ASTANA. 22 tamyz. QazAqparat - «Nazarbaev Ýnıversıteti» Kembrıdj ýnıversıteti men Mektebi jáne Pensılvanııa ýnıversıtetindegi seriktesterimen birlesip Joǵary bilim berý mektebin ashady, dep habarlaıdy JOO baspasóz qyzmeti.
RM. kz saıtynyń málimetinshe, yntymaqtastyq týraly memorandýmǵa taraptar Astana qalasyndaǵy joǵary bilim berý kóshbasshylarynyń Eýrazııa forýmynda qol qoıǵan.
«Nazarbaev Ýnıversıteti Joǵary Bilim berý mektebi arqyly bilim berý salasynda aldyńǵy qatarly ilim jáne ǵylymdy qoldaný tájirıbesin jınaqtaý jáne taratý mindetin júzege asyrady», - delingen habarlamada.
Joǵary Bilim berý mektebinde orta jáne joǵary bilim berý menedjmenti mamandyqtaryna magıstratýra baǵdarlamasy boıynsha oqytý 2013 jyldyń qyrkúıek aıynda bastalady.
Sondaı-aq, keleshekte doktorantýranyń PhD baǵdarlamasy iske qosylady. Nazarbaev Ýnıversıtetiniń Joǵary bilim berý mektebi - halyqaralyq JOO-da Qazaqstannyń jáne shet elderdiń stýdentteri oqıtyn bolady dep kútilýde.
Jańa mektep Qazaqstannyń bilim berý júıesi úshin basqarý kadrlaryn daıarlaýdaǵy aldyńǵy qatarly jáne ǵylymı ortalyq bolady, sondaı-aq seriktesterimen jáne basqa da sheteldik oqý oryndary men zertteý ortalyqtarymen birlese zertteýler júrgizý arqyly bilim berý saıasaty salasyndaǵy zertteýlerdiń ǵylymı bazasyn jetildirýge múmkindik beredi dep kútilýde.
