Nazarbaev Ýnıversıtetinde týberkýlezdi erte anyqtaýǵa arnalǵan bıosensor jasalýda
ASTANA. 21 naýryz. QazAqparat - Nazarbaev Ýnıversıtetinde jasalyp jatqan optıkalyq bıosensor týberkýlez aýrýyn erte jáne dál anyqtaýǵa múmkindik beredi, dep habarlady ýnıversıtettiń assıstent-professory Damıra Qanaeva pm.kz saıtyna bergen suhbatynda.
Nazarbaev Ýnıversıtetiniń Bıosensorlar jáne bıoaspaptar departamenti bıologııalyq taldamanyń negizinde adam aǵzasynda týberkýlez taıaqshasynyń bar-joǵyn tez jáne dál anyqtap beretin optıkalyq bıosensor jasaý jobasyn júrgizýde. «Jobanyń biregeıligi sol, bıosensor týberkýlezdi anyqtaý kezinde sapalyq kórsetkishti jaqsartýǵa múmkindik beredi jáne onyń qorytyndysy naqty bolady»,- dep atap kórsetti D.Qanaeva.
Ǵalymnyń aıtýynsha, bul apparattyń ereksheligi sol, qorytyndy zertteme tez jasalady. Kádimgi konservatıvtik dıagnostıkaǵa birneshe kún ýaqyt ketse, bıosensor 3 saǵattyń ishinde nátıje beredi. Oǵan qosa, optometrdiń aýrýdy erte kezden anyqtaý múmkindigi bar, bul dıagnostıkada eń mańyzdy másele.
«Optıkalyq bıosensordyń jumysy magnıttik nanobólshekterge, kvanttyq núkteler men týberkýlezdi erte anyqtaýǵa múmkindik beretin optometrlerge negizdelgen»,- deıdi Damıra Qanaeva.
Sondaı-aq, jańa apparattyń ıkemdiligi de zor bolmaq jáne ony kez-kelgen kompıýterge qosýǵa bolady.
Ǵalymnyń aıtýynsha, bul optıkalyq bıosensor densaýlyq saqtaý salasyndaǵy ınnovatsııalyq joba bolyp tabylady. «Jasalyp jatqan bıosensor bizge týberkýlezdi anyqtaý deńgeıin jaqsartýǵa jáne elimizdiń densaýlyq saqtaý salasyn jańa deńgeıge kóterýge múmkindik beredi», - deıdi assıstent-professor.
