«Nazarbaev Ýnıversıtetinde» týberkýlez qozdyrǵyshtaryn úsh saǵatta anyqtaýǵa arnalǵan bıosensor jasalýda
ASTANA. 23 qyrkúıek. QazAqparat - «Nazarbaev Ýnıversıtetinde» júzege asyrylyp jatqan optıkalyq bıosensor jasaý jobasy týberkýlez aýrýyn úsh saǵattyń ishinde anyqtaýǵa múmkindik beredi. Bul jaıynda Pm.kz saıty habarlap otyr.
«Magnıttik nanobólshekter men kvanttyq núktelerdiń negizinde dıagnostıkalyq optıkalyq bıosensor jasaý» jobasy týberkýlez qozdyrǵyshtaryn jedel anyqtaýǵa arnalǵan joba bolyp tabylady.
Joba avtorlary kvanttyq núkteler men magnıttik nanobólshekter qoldanylatyn optometrdiń negizinde optıkalyq bıosensor jasaýdy josparlap otyr.
Bul joba qazirgi birneshe kúnge sozylatyn qozdyrǵysh detektsııasy protsesin úsh saǵatqa deıin jedeldetýge múmkindik beredi, al bul óz kezeginde aýrýdyń anyqtalý deńgeıin arttyratyn bolady.
Oǵan qosa, bıosensordy engizý shyǵyndardy qysqartyp, serpindi dıagnostıkalyq júıelerdi ıgerýdiń perspektıvasyn ashady. Joba «Nazarbaev ýnıversıtetiniń» Pánaralyq aspaptyq ortalyǵynda zerttelýde.
