Nazarbaev Ýnıversıtetinde stýdentterge arnalǵan sport alańdary kesheni ashyldy
ASTANA. 4 mamyr. QazAqparat - Nazarbaev Ýnıversıtetinde 2 mamyrda «Tsesnabank» AQ-nyń demeýshilik qoldaýymen stýdentterge arnalyp salynǵan sport alańdary kesheniniń ashylý rásimi ótti,
dep habarlady atalmysh oqý ornynyń Kommýnıkatsııa jáne marketıng departamentinen. Keshenge shaǵyn fýtbol, gandbol, basketbol, voleıbol jáne tennıs oınaýǵa arnalǵan 8 sport alańy, sondaı-aq demalýǵa arnalǵan alań men balalarǵa arnalǵan alań kiredi. Sport alańdarynyń jalpy kólemi 7270 sharshy metrdi quraıdy. Alańdar mýzykalyq kolonkalarmen jáne jaryqpen jabdyqtalǵan. Al qurylystarynyń ınnovatsııalyq ádistemesi olardy jyl boıy paıdalanýǵa múmkindik beredi. Mysaly, qys mezgilinde alańdy shaǵyn fýtbol oınaýǵa (sıntetıkalyq shóppen jabylǵan), hokkeı oınaýǵa jáne konkı tebýge paıdalanýǵa bolady. Qalǵan alańdardyń edeni akrılmen jabylǵan.
Saltanatty ashylý rásimine «Tsesnabank» AQ Basqarma Tóraǵasy D.A.Jaqsybek jáne «Nazarbaev Ýnıversıteti» DBU Atqarýshy keńesiniń Tóraǵasy A.B.Sárinjipov qatysty. Olar Nazarbaev Ýnıversıtetiniń stýdentterin jańadan paıdalanýǵa tapsyrylyp jatqan sport alańdarynyń ashylýymen quttyqtady jáne ótken oqý jyly sport salasynda eń úzdik jetistikter men nátıjeler kórsetken Ýnıversıtet stýdentterine gramotalar men estelik syılyqtardy tapsyrdy.
Atap aıtqanda, Astana qalasynyń 12 joǵary oqý ornynyń stýdenttik komandalarynyń arasynda ótkizilgen spartakıadada shahmattan, ústel tennısinen, shańǵydan, prezıdenttik testilerdi tapsyrýdan, fýtboldan, basketboldan, voleıboldan júldeli orynǵa ıe bolǵan Nazarbaev Ýnıversıtetiniń qurama komandasy marapattaldy.
