Nazarbaev ýnıversıtetinde robot-skaner paıda boldy
ASTANA. 27 naýryz. Aqparat - Nazarbaev ýnıversıtetiniń kitaphanasyna tolyǵymen robottandyrylǵan skaner ornatyldy.
Búgin ýnıversıtet qabyrǵasynda ótken semınar barysynda atalmysh zamanaýı skanerdi jetkizýshi «Elar» kompanııasynyń marketıng boıynsha dırektory Petr Plotnıkov tehnologııalyq keshenniń jumysymen tanystyrdy.
Avtomattandyrylǵan robot-skaner stýdentter men ustazdarǵa kitaptardyń, gazet-jýrnaldardyń elektrondyq kóshirmelerin jasaýǵa múmkindik beredi.
P. Plotnıkovtyń aıtýynsha, ELARobot P-2 avtomattandyrylǵan skaner qurylǵysy birneshe ǵasyr buryn jaryqqa shyqqan eń kóne kitap jádigerlerdiń ózine esh zaqym tıgizbeı, elektrondy nusqaǵa kóshirip alýǵa múmkindik beredi. Sonymen qatar saǵatyna 2,5 myń bet skanerlep, birneshe mıllıon kitap pen qujat qoryn elektrondy júıege jyldam aýdarýǵa kúshi jetedi. Bul sandyq kontentti qurýǵa ketetin ýaqytty 5 esege deıin únemdeıdi. Sondyqtan qazirgi ýaqytta ol Astanadaǵy Ulttyq akademııalyq kitaphanada jáne Ulttyq muraǵatta keńinen qoldanylýda.
Bul robot «elektrondyq úkimet» aqparattyq júıesin qurýǵa da paıdalanylyp otyr. Máselen, byltyr eldegi 7 ákimdiktiń biryńǵaı aqparattyq jáne muraǵattyq júıesin jasaýǵa osy skaner paıdaǵa jaraǵan.
Bıyl Qazaqstannyń «elektrondyq úkimeti» aıasynda kitaphanalardy aqparattandyrý jobasy qurylatyn bolady. Joba sheńberinde eldiń basqa da qalalarynda ornalasqan kitaphanalardy aqparattyq tehnologııalarmen jabdyqtap, olardyń elektrondy kontentiniń biryńǵaı ortalyǵyn qurý kózdelýde.
«Munyń barlyǵy kez kelgen azamatqa, árbir zertteýshige «elektrondyq úkimet» baǵdarlamasy aıasynda ınternetten tikeleı túpderekterdi erkin alýyna múmkindik jasaý úshin qolǵa alynýda», - deıdi P. Plotnıkov.
Reseıde mundaı qurylǵylardyń 5 danasy, Ýkraınada - 1 jáne Eýropada tek onshaqty danasy ǵana bar. Qazaqstanda shamamen 15-ten astam nysan atalǵan elektrondy qurylǵylarmen qamtamasyz etilgen.
«Qazaqstan postkeńestik memleketter arasynda tehnologııalyq damý deńgeıi boıynsha jáne elektrondy úkimetti qurý salasynda sózsiz kósh bastap keledi. Men RF aqparattyq úkimetin qurý boıynsha úkimettik komıssııanyń múshesi bolyp tabylamyn. Osy ýaqytqa deıin men óz baıandamalarymda Qazaqstannyń tájirıbesin mysalǵa alýǵa jáne ozyq zańnamasyn úlgi etýge májbúrmin», - dep atap ótti P. Plotnıkov.
