«Nazarbaev Ýnıversıtetinde» materıaldardy zertteýdiń ınnovatsııalyq algorıtmderi zerttelýde
ASTANA. 22 qyrkúıek. QazAqparat - «Nazarbaev Ýnıversıtetinde» iske asyrylyp jatqan keýekti materıaldardyń qasıetterin zertteý jónindegi topologııalyq ádisterdi zertteý jobasy
ónerkásiptik kásiporyndarǵa keýekti materıaldardy belsendi qoldanýǵa múmkindik beredi. Bul jaıynda Pm.kz saıty habarlaıdy.
«Keýekti materıaldar men olardyń energetıkalyq landshafttarynyń keıbir qasıetterin anyqtaý úshin topologııalyq tásilder men ádisterdiń algorıtmder keshenin ázirleý» jobasy keýekti materıaldardy zertteý nátıjesinde alynǵan málimetterdi taldaý jáne vızýalızatsııalaý ádisterin jasaýǵa baǵyttalǵan.
Basty maqsat keýekti materıaldardyń ózindik qasıetterin anyqtaý bolyp otyr. Jańa topologııalyq ádis tájirıbelerdiń barysyn vızýaldy baqylaýdy ońtaılandyrady jáne zertteý jumystarynyń shyǵyny men merzimin azaıtady. Zertteý nátıjesinde alynǵan málimetter ónerkásiptik kásiporyndarǵa otandyq ındýstrııaǵa keýekti materıaldardy belsendi qoldanýǵa tezirek aýysýǵa kómektesedi.
Bul jobany iske asyrý kompıýterlik taldaý jáne materıaldardy modeldeý ádisterin keńinen qoldanýǵa jáne ónerkásiptik ındýstrııanyń damýyna oń áserin tıgizedi. Joba «Nazarbaev Ýnıversıtetiniń» Energetıkalyq zertteý ortalyǵynda zerttelýde.
