Nazarbaev Ýnıversıtetinde Job/internship fair & Networking bos jumys oryndarynyń jármeńkesi ótti
ASTANA. QazAqparat - Keshe QR Bilim jáne ǵylym mınıstrliginiń qoldaýymen Nazarbaev Ýnıversıteti jáne Halyqaralyq baǵdarlamalar ortalyǵy túlekter men stýdentterge arnalǵan Job/internship fair & Networking bos jumys ornynyń jármeńkesin ótkizdi.
Bul týraly "Halyqaralyq baǵdarlamalar ortalyǵy" AQ habarlaıdy.
15-naýryz kúni «Nazarbaev Ýnıversıteti» DBBU-da Qazaqstan Respýblıkasy Prezıdentiniń «Bolashaq» halyqaralyq stıpendııasy túlekterin jumysqa ornalastyrý úshin bos jumys oryndarynyń jármeńkesi bolyp ótti.
Atalmysh is-sharaǵa ýnıversıtettiń tehnıkalyq jáne gýmanıtarlyq mamandyqtar boıynsha oqıtyn 500-den astam sońǵy kýrs stýdentteri, sondaı-aq, «Bolashaq» halyqaralyq stıpendııasynyń 600-jen astam túlekteri qatysty. Іs-sharanyń resmı ashylý saltanaty «Nazarbaev Ýnıversıteti» DBBU Prezıdenti Shıgeo Katsýdyń alǵysózimen bastaldy. Jármeńke barysynda jumys berýshiler kompanııanyń qyzmeti jaıly tusaýkeser jasap, kásibı mashyqty damytý trennıngterin ótkizdi, jumys izdeýshilermen suhbattar jáne testileý júrgizdi. QR Syrtqy ister mınıstrliginiń jaýapty hatshysy Asqar Mýsınov tusaýkeser ótkizse, paneldi sessııalar (Networking) barysynda qatysýshylar ár jyldardaǵy «Bolashaq» baǵdarlamasynyń tanymal túlekterimen beıresmı kezdesý ári tildesý múmkindigine ıe boldy. Olardyń arasynda «Báıterek» UBH» AQ Basqarma tóraǵasy Qýandyq Bıshimbaev ta bar.
Aıta keteıik, Job/internship fair & Networking bos jumys oryndarynyń jármeńkesine 90-nan astam qazaqstandyq jáne sheteldik kompanııalar qatysty.
Uıymdastyrýshylar mundaı is-sharanyń endi jyl saıyn ótkizilip turatynyn jetkizdi.
