Nazarbaev Ýnıversıtetinde birneshe baǵdarlama ashylady
ASTANA. QazAqparat - Nazarbaev Ýnıversıtetinde birneshe baǵdarlama ashylady. Bul týraly búgin Nazarbaev Ýnıversıtetinde ótken ashyq esik kún aktsııasy aıasynda BAQ ókilderine suhbat bergen Qabyldaý departamentiniń dırektory Gúlnaz Bólebaeva aıtty, dep habarlaıdy QazAqparat.
«Búgingi kúni Nazarbaev Ýınversıtetinde 4200-den astam stýdent oqyp jatyr. Olar magıstratýra, doktorantýra, bakalavrıat jáne ýnıversıtetke oqýǵa túsý úshin daıyndyq baǵdarlamasy boıynsha oqıdy. Jalpy, stýdentter Gýmanıtarlyq jáne áleýmettik ǵylymdar, Medıtsına, Joǵary bıznes, Joǵary memlekettik saıasat, Joǵary bilim berý, Injenerııa, ǵylym men tehnologııalar mektepterinde bilimderin shyńdaıdy», - dedi ol.
Sonymen qatar, onyń aıtýynsha, bıyldan bastap taý-ken isi mektebinde magıstratýra, al Joǵary memlekettik saıasat mektebinde PhD mamandyqtary ashylǵan. Al kelesi jyldan bastap bakalavrıat mamandyǵy boıynsha birneshe baǵdarlama ashý kózdelgen.
«Naqty aıtqanda munaı-gaz ınjenerııasy, taý-ken isi jáne geologııa ınjenerııasy baǵdarlamasyn ashý josparymyzda bar. Bizde barlyq sabaqtar birinshi kýrstan bastap aǵylshyn tilinde júrgiziledi. Sonymen qatar qazaq tili de oqytylady. Jalpy Nazarbaev Ýnıversıtetine túskisi keletin talapkerdiń bilimi joǵary bolýy tıis», - dedi Gúlnaz Bólebaeva.
Departament basshysynyń aıtýynsha, munan bólek aldaǵy bir aıdyń kóleminde Nazarbaev Ýnıversıtetine túskisi kelgen talapkerlerge daıyndyq kýrsy ashylyp, onda olar aǵylshyn tilin jetik meńgeretin bolady.
