Nazarbaev Ýnıversıtetinde bilim alýǵa aldaǵy jylǵa 503 stýdent ótti
ASTANA. 10 jeltoqsan. QazAqparat /Rýslan Ǵabbasov/ - Nazarbaev Ýnıversıtetinde bilim alýǵa aldaǵy jylǵa 503 stýdent ótti. Bul týraly búgin Astanada QR Úkimet basshysy Kárim Másimovtyń qatysýymen ótip jatqan Nazarbaev Ýnıversıteti Qamqorshylyq keńesiniń kezekti otyrysynda atalǵan oqý ornynyń Atqarýshy keńesiniń tóraǵasy Aslan Sarınjıpov málim etti.
Onyń aıtýynsha, aldaǵy jylǵa talapkerlerdi qabyldaý boıynsha qabyldaý emtıhandarynyń ekinshi kezeńi ótti. «Atap aıtqanda, oqýǵa túskenderdiń barlyǵy elimizdiń barsha óńirlerinen qamtyldy. Osy oqý ornyna túsýge 4 myń 200 stýdent ótinim berdi. Emtıhandardy 550-i sátti tapsyrdy. Biz olardyń ishinen 503 stýdentti qabyldadyq. Olardyń ishinde bıyl «Altyn belgi» ıegerleri 33 paıyzdy qurap otyr»,-dedi ol.
Atap aıtqanda, búginde ýnıversıtettegi stýdentterdiń jalpy sany 972-ge jetti. Olardyń 469-y bakalavrıat baǵdarlamasy boıynsha oqıdy, al 503-i «Foundation» daıyndyq baǵdarlamasy aıasynda bilim alady.
Atqarýshy keńes tóraǵasynyń sózine qaraǵanda, Ýnıversıtette búginde jalpy 20-ǵa jýyq zerthana jumys istep jatyr. Bul zerthanalardy jabdyqtarmen jasaqtaý boıynsha halyqaralyq jetkizýshilermen kelisimsharttar jasaldy. Sonymen qatar A. Sarınjıpov stýdentterdiń áleýmettik, sporttyq jáne mádenı ómirlerine arnalyp barsha jaǵdaı jasalǵanyn aıta kele, oqý ornynda stýdenttik úkimet jumys istep jatqandyǵyn, 30-ǵa tarta stýdettik uıymdar men klýbtar qurylǵanyn jetkizdi. «Búginde 3 jataqhana paıdalanýǵa berildi. Onda 856 stýdent turyp jatyr»,-dedi keńes tóraǵasy.
Aıta keteıik, Qamqorshylyq keńes Nazarbaev Ýnıversıtetiniń basqarýshy organy bolyp tabylady. Keńes 10 adamnan quralǵan, sondaı-aq oǵan QR Premer-Mınıstri Kárim Másimov tóraǵalyq etedi.
