Nazarbaev ýnıversıtetinde Azııa elderi stýdentteriniń konferentsııasy ótedi
ASTANA. QazAqparat – Garvardtyń Azııa jáne halyqaralyq qatynastar jónindegi jobasy konferentsııasyn (HPAIR 2019 Asia Conference) ótkizý úshin Nazarbaev Ýnıversıteti tańdaldy, dep habarlaıdy QazAqparat tilshisi.
Osy konferentsııany ótkizý úshin Sıngapýr, Japonııa, Qytaı, Taıvan jáne Úndistan ýnıversıtetteri úmitker bolǵan edi.
Uıymdastyrý komıteti basshysy, NÝ gýmanıtarlyq jáne áleýmettik ǵylymdar mektebiniń stýdent, NÝ stýdentter úkimetiniń prezıdenti Leılá Ahmetovanyń aıtýynsha, konferentsııany osy ýnıversıtette ótkizý týraly sońǵy sheshimde qabyldaý úshin Garvard ýnıversıteti (AQSh) HPAIR uıymdastyrý komıtetiniń delegatsııasy Astanaǵa kelip, Nazarbaev Ýnıversıteti uıymdastyrý komıtetiniń qatysýshylarymen kelissózder júrgizgen. Endi NÝ komandasy aıtýly sharaǵa daıyndalý úshin Garvardqa attanady.
HPAIR-2019 konferentsııasynyń Astanada Jastar jylynda ótip jatqany erekshe nazar aýdartady.
Sharanyń kún tártibinde alty taqyryptyq panel bar, olar: áleýmettik saıasat jáne ınklıýzıvti damý, álemdik ekonomıka, qaýipsizdik jáne dıplomatııa, bıznes jáne tehnologııalar, qorshaǵan ortanyń turaqtylyǵy jáne energetıka, mádenıet jáne medıa.
Aıta keteıik, Garvardtyń Azııa jáne halyqaralyq qatynastar jónindegi jobasy» (The Harvard College Project for Asian and International Relations / HPAIR) - Garvard ýnıversıtetiniń Azııa elderinde ótkizetin eń iri stýdentter konferentsııasy. Ol stýdentter men jas kásibı mamandar Tynyq muhıty jáne Azııa elderindegi mańyzdy ekonomıkalyq, saıası jáne áleýmettik máselelerdi talqylaý úshin uıymdastyrylady. 1991 jyldan beri konferentsııa álemniń 12 elinde ótip, onyń aıasynda jalpy 32 000 qatysýshy bas qosty. Konferentsııada túrli elderdiń basshylary, belgili ǵalymdar, Nobel syılyǵynyń laýreattary, dıplomattar, halyqaralyq uıymdardyń basshylary baıandama jasaıdy.
Avtor: Kamıla Ámirova
