Nazarbaev Ýnıversıtetinde arnaıy bilim granttary engiziledi
ASTANA. QazAqparat - Nazarbaev Ýnıversıteti úshin bilim berý granttary men stıpendııalardyń jekelegen uǵymdaryn engizý josparlanady. Bul týraly búgin Parlament Májilisinde «Qazaqstan Respýblıkasynyń keıbir zańnamalyq aktilerine derbes bilim berý uıymdarynyń qyzmetin retteý máseleleri boıynsha ózgerister men tolyqtyrýlar engizý týraly» zań jobasyn tanystyrý barysynda málim boldy.
«Nazarbaev Ýnıversıteti ashylǵannan beri onda stýdentterdi qabyldaýdyń erekshe tártibi júzege asyp keledi. Bul negizinen álemniń jetekshi zertteý ýnıversıtetteriniń ozyq halyqaralyq praktıkalary boıynsha qalyptasty. Ekinshi jaǵynan, zańnamaǵa sáıkes, bizdiń respýblıkamyzda memlekettik bilim berý granttaryn ıelený úshin qajetti ball tek qana Biryńǵaı ulttyq testileý nátıjeleri boıynsha berilýi kerek. Sonymen qatar, Nazarbaev Ýnıversıtetinde úmitkerlerge arnaıy qabyldaý emtıhandary ótkiziletini belgili. Soǵan baılanysty zań jobasymen Ýnıversıtet úshin arnaıy bilim granttary uǵymy engiziledi», - dedi T.Balyqbaev.
Budan bólek, zań jobasymen Nazarbaev Ýnıversıtetindegi stıpendııa uǵymyn engizý de kózdeledi. Bul rette Ýnıversıttettegi stýdentterdiń bilimin baǵalaý úlgisi qoldanylyp, stıpendııalar taǵaıyndaý máseleleri men olardy tóleý sharalary zań normasy arqyly retteledi.
