Nazarbaev Ýnıversıteti zerthanasy adamnyń qartaıý protsesin zerttemek
ASTANA. QazAqparat - Nazarbaev Ýnıversıteti National laboratory Astana men «Insilico Medicine» kompanııasy adamnyń qartaıýy men jasqa tán aýytqýshylyqtarǵa baılanysty birlese zerdeleý úshin yntymaqtastyq kelisimine qol qoıýǵa nıetti.
Bul týraly atalǵan JOO-nyń baspasóz qyzmetinen habarlady.
Nazarbaev Ýnıversıteti National Laboratory Astana bas dırektory Jaqsybaı Jumadilovtiń aıtýynsha, zerthana ǵalymdary zertteý jumystarynyń basym baǵyttarynyń biri aýrý-syrqaýsyz qartaıý jáne ómir jasyn deni saý kúıinde uzartý máseleleri bolyp otyr.
«Sondyqtan, biz qartaý protsesin zertteý úshin jasandy ıntellektti qoldaný salasynda iri ázirlemelerge ıe Insilico Medicine kompanııasymen yntymaqtastyqqa daıynbyz», - dedi ol.
Taraptar kelisim aıasynda kóptegen úlgilerdiń málimetteri negizinde adam qartaıýy barysynda bıomarkerleriniń (densaýlyq jaı-kúıiniń ındıkatorlary) jasandy túrde ıntellektýaldy damytýǵa kúsh salmaq. Munan bólek, «Insilico» kompanııasy saý tin men aýrýǵa shaldyqqan tinniń arasyndaǵy teńgerimdi ózgeristerdi baǵalaý, túrli jastaǵy tinderdi salystyrý syndy qosymsha qyzmettermen de qamtamasyz etetin bolady.
«Nazarbaev Ýnıversıteti zamanaýı qural-jabdyqtary men jetekshi halyqaralyq ýnıversıtetterde bilim alǵan biliktiligi joǵary qyzmetkerleri bar Shyǵys Eýropa men Ortalyq Azııadaǵy qarqyndy damýshy ýnıversıtetterdiń biri sanalady. Bul mekeme eń aldyńǵy qatarly tehnologııalardyń júzege asyrylatyn ornyna aınalǵan. Bizdiń kompanııa ómir uzaqtyǵyn zertteýde joǵary tehnologııalyq sheshimderdi jetkizýshilerdiń biri bolatyndyǵy qýantady», - dedi «Insilico» kompanııasynyń bas dırektory Aleksandr Javoronkov.
