Nazarbaev Ýnıversıteti Túrkistan taýlarynda qaıtys bolǵan stýdentteriniń týystaryna kóńil aıtty
«Eki stýdentimizdiń qaıǵyly jaǵdaıda qaza tapqany týraly aqparatty zor kúızelispen qabyldadyq. Olar Túrkistan oblysynyń taýlaryna saparǵa attanǵan, quramynda 7 adam týrıstik toptyń ishinde bolǵan edi. Stýdentterimizdiń otbasylaryna, týǵan-týystary men dosparyna shyn nıetten kóńil aıtamyz. Nazarbaev Ýnıversıteti óz tarapynan qaza tapqandardyń otbasyna qajetti barlyq kómek kórsetip, qoldaý bildiretin bolady. Bul biz úshin azaly kún. Toptyń qalǵan músheleri jaqyn arada din aman tabylatyndyǵyna úlken senim artamyz», - delingen ýnıversıtettiń baspasóz qyzmeti taratqan kóńil aıtýda.
Eske salaıyq, Tólebı aýdanynyń Saıram-Ógem memlekettik ulttyq tabıǵı parkiniń aýmaǵynda 7 adamnyń joǵalǵany týraly habarlama 2021 jylǵy 25 mamyrda 18 saǵat 30 mınýtta kelip tústi. Olardyń úsheýi keshe tabylǵan bolatyn. 21 mamyrda týrıster jaıaý «Sary-aıǵyr» shatqalyna bet alǵan jáne 24 mamyrda qaıtý qajet bolǵan. Alaıda qaıtar jolda adasyp ketken. Al búgin týrıstik toptyń 2 múshesiniń múrdesi tabylǵany habarlandy.
