Nazarbaev Ýnıversıteti Tehnoparkinde biregeı ǵylymı jobalar tanystyryldy (FOTO)
ASTANA. QazAqparat - Búgin Nazarbaev Ýnıversıteti aýmaǵynda Tehnoparktiń resmı ashylýy kezinde QR Bilim jáne ǵylym mınıstri Aslan Sárinjipovke kommertsıalandyrý jelisi boıynsha iriktelingen qazaqstandyq ǵalymdardyń jobalary tanystyryldy.
Atap aıtqanda, mınıstrge keńselik qaǵazdardy (tazartý ) qaıta óńdeý ádisi, gıdrofobty kompozıtti materıaldardy shyǵarý, skanerleýshi zondty nanotomograf, onlaın oqytý úshin adaptıvti attestatsııanyń tehnologııalary, qazaqsha sózderdi tanýǵa arnalǵan zııatkerlik júıe jáne basqa da jobalar kórsetildi.
«Tehnoparktiń tujyrymdamasyn Koreıa jáne Ulybrıtanııadaǵy halyqaralyq seriktesterimizben birge ázirledik. Osynda Nazarbaev Ýnıversıteti ǵalymdary daıarlaǵan onǵa tarta joba óz jumysyn bastaıdy», - dedi A. Sárinjipov tehnoparktegi jobalarmen tanysqannan keıin.
Aıta keteıik, Tehnoparktiń aýmaǵy 2 myń sharshy metrdi qamtyp otyr. Ol Nazarbaev Ýnıversıtetiniń Zııatkerlik ınnovatsııalyq klasterdi damytý josparyn júzege asyrýdyń jalǵasy jáne ǵylym men bıznestiń damýyna jańa múmkindikter ashyp otyr. Atalǵan keshenniń aýmaǵynda jańaratyn energııa kózderin zertteýge úshin tısti ǵylymı jumystar júrgiziledi. Ol úshin tehnoparkte fotoelektrlik panelder, gelıokollektorlar, jel generatorlary men jylý nasostary ornatylǵan.
