«Nazarbaev Ýnıversıteti», «Nazarbaev Intellektýaldy mektepteri» jáne «Nazarbaev qory» mártebesi týraly zań jobasy kóshpeli otyrysta talqylanýda
ASTANA. 13 jeltoqsan. QazAqparat /Qanat Mámetqazyuly/ -Búgin QR Parlamenti Májilisi Áleýmettik-mádenı damý komıtetiniń músheleri Astanadaǵy «Nazarbaev Zııatkerlik mektebi» AQ-y ǵımaratynda kóshpeli otyrystaryn ótkizýde.
Atalǵan jıyn barysynda «Nazarbaev Ýnıversıteti», «Nazarbaev Zııatkerlik mektepteri», «Nazarbaev Qory» mártebesi týraly» jáne «Qazaqstan Respýblıkasynyń keıbir zańnamalyq aktilerine bilim máseleleri boıynsha ózgerister men tolyqtyrýlar engizý týraly» zań jobalary talqylanýda.
Esterińizge sala keteıik, zań jobasy QR Prezıdenti N. Nazarbaevtyń bıylǵy joldaýyna sáıkes ázirlengen bolatyn. Joldaýda Memleket basshysy Astanada túlekterge erekshe qabyldaý sharttary men aıryqsha qoıylatyn talaptary bar bedeldi ınjenerlik-ǵylymı oqý ornyn qurýdy tapsyrǵan bolatyn. Sonymen qatar, Elbasy tıisti zań jobasyn Parlamentke engizý mindetin alǵa qoıǵan edi. Osyǵan oraı, «Nazarbaev Ýnıversıteti», «Nazarbaev Zııatkerlik mektepteri» jáne «Nazarbaev Qory» qyzmeti úshin zańnamalyq negiz jasaý qazirgi kezde qoldanylyp júrgen «Bolashaq» halyqaralyq prezıdenttik baǵdarlamasynyń qısyndy jalǵasyna aınalady jáne Qazaqstan Respýblıkasynyń ındýstrııaldyq-ınnovatsııalyq damýynyń mindetterin sheshý úshin ulttyq ınjenerlik-tehnıkalyq jáne ǵylymı kadrlardy daıarlaýda sapaly serpilis jasalýyn qamtamasyz etedi.
Zań jobasy bilim berý salasynda qazirgi zamanǵy basqarý nysandaryn engizýge, ýnıversıtettiń, zııatkerlik mektepterdiń ınnovatsııalyq bilim berý baǵdarlamalary men ǵylymı jobalardy iske asyrý úshin qajetti akademııalyq erkindigi men derbestigin damytýǵa jol ashady. Sonymen birge bilim berý salasynda eń úzdik álemdik praktıkany eskere otyryp, jańa bilim standarttaryn engizýge jaǵdaı jasaýǵa baǵyttalǵan.
Budan bólek, zań jobasy boıynsha «Nazarbaev Ýnıversıteti» men «Nazarbaev Intellektýaldyq mektepteri» úshin erekshe uıymdastyrýshylyq-quqyqtyq forma qurylatyn bolady. Qujat Ýnıversıtet pen mektepter úshin erekshe uıymdastyrýshylyq-quqyqtyq formany - bilim berýdiń avtonomdy kommertsııalyq emes uıymyn qurýdy kózdeıdi.
