«Nazarbaev Ýnıversıteti» men mektepteri bilim men ǵylym salasyndaǵy júıeli reformalardyń katalızatoryna aınalýy qajet - Bilim mınıstri

Búgin QR Parlamenti Májilisiniń jalpy otyrysynda «Nazarbaev Ýnıversıteti», «Nazarbaev Zııatkerlik mektepteri» jáne «Nazarbaev Qory» mártebesi týraly» zań jobasy boıynsha baıandama jasaǵan Bilim jáne ǵylym mınıstri Baqytjan Jumaǵulov osylaı málim etti.

«Ulybrıtanııa ýnıversıtetteri avtonomdyqtyń joǵary dárejesine ıe. Sonymen qatar akademııalyq baǵdarlamany derbes bekitedi, ǵylymı basymdyqtardy, qyzmetkerlerdiń eńbekaqy deńgeıin, stýdentterdi erkindikpen irikteýdiń krıterıılerin ózderi anyqtaıdy. Bul olardyń qazirgi álemdegi ózgeristerge zaman talabyna saı beıimdelýine múmkindik beredi. Budan bólek, álemniń jetekshi ýnıversıtetteri lıtsenzııa alýdyń ornyna halyqaralyq uıymdarda akredıtteledi. Tıisti rásimniń bolýy joǵary oqý ornynyń basqa ýnıversıtetter arasynda bedelin kóteredi. Sonymen qatar, jeke ýnıversıtettiń qyzmetin retteıtin arnaıy zańdy qabyldaý halyqaralyq tájirıbege sáıkes keledi», - dedi zań jobasyna baılanysty álemdik tájirıbelerge toqtalǵan Bilim jáne ǵylym mınıstri B. Jumaǵulov.

Onyń aıtýynsha, «Nazarbaev Ýnıversıteti» jáne «Nazarbaev Zııatkerlik mektepteri» týraly arnaıy zań qabyldaý arqyly atalǵan bilim oshaqtarynyń quqyqtyq negizi qalanady. Budan bólek elimizdegi barsha oqý oryndaryna jańa jaǵdaılar jasaýǵa múmkindik beredi. «Nazarbaev Ýnıversıteti» joǵary bilim men ǵylym salasyndaǵy ulttyq serpindi, mańyzdy joba. Ol ýnıversıtettik basqarýdyń jańa nysandaryn engizý, halyqaralyq standarttarǵa saı keletin jańa akademııalyq baǵdarlamalardy synaqtan ótkizý jáne beıimdeý, ǵylymı zertteýler júrgizýdiń halyqaralyq standarttaryn endirý baǵyttary boıynsha Qazaqstannyń barlyq ýnıversıtetteri úshin jańa model bolyp tabylady. Osylaısha, bul ýnıversıtet pen mektepter bilim men ǵylym salasyndaǵy júıeli reformalardyń katalızatoryna aınalýy qajet», - dedi Bilim mınıstri.