Nazarbaev Ýnıversıteti el damýyn jedeldetetin 45 ǵylymı joba ázirleýde - G. Ábdiqalyqova
ASTANA. QazAqparat - Nazarbaev Ýnıversıtetinde qazirgi ýaqytta Qazaqstannyń damýyn jedeldetýge arnalǵan 45 ǵylymı joba júzege asyrylýda. Bul týraly búgin Astanada ótip jatqan Joǵary bilim kóshbasshylarynyń ІІІ Eýrazııalyq forýmynda (EHELF) QR Premer-mınıstriniń orynbasary Gúlshara Ábdiqalyqova málim etti.
«Qazirdiń ózinde Nazarbaev Ýnıversıtetinde jańartylatyn energetıka, qorshaǵan orta, kompıýterlik tehnologııalar, bıohımııa, robottehnıkasy jáne fızıka sııaqty baǵyttar boıynsha 45 ǵylymı joba júrgizilip jatyr», - dedi ol.
Onyń aıtýynsha, elimizdiń barlyq joǵary oqý oryndarynda ǵylym men bıznestiń berik baılanysy ornatylsa ǵana, memleket qarqyndy damý jolyna túse alady. «Bul kásiporyndarǵa ınnovatsııalardy tıimdi engizip, jańa ónimder men qyzmetterge jol ashady», - deıdi vıtse-premer. Aıta keteıik, bıylǵy forýmnyń negizgi taqyryby "Tabysty ýnıversıtet qurý joldary" dep ataldy. Oǵan elimizdiń bedeldi JOO-larynyń rektorlary, Kembrıdj, Toronto, Hartford ýnıversıtetteriniń belgili ǵalymdary men professorlary qatysýda.
