Nazarbaev Ýnıversıteti bazasynda ınnovatsııalyq klaster quryldy

ASTANA. QazAqparat - Qazaqstan Respýblıkasynyń Prezıdenti N. Nazarbaev 2009 jyly elimizde halyqaralyq deńgeıge saı ýnıversıtet qurý týraly jobaǵa bastamashylyq etken bolatyn. Al 2010 jyly respýblıka aýmaǵynda buryn -sońdy bolyp kórmegen úzdik tehnologııalarmen jabdyqtalǵan Nazarbaev Ýnıversıtetiniń esigi alǵashqy stýdentterge ashyldy. Nazarbaev Ýnıversıteti - ınnovatsııalyq zertteý qyzmetin júrgizýge baǵyttalǵan qazirgi zamanǵa saı, kúshti ǵylymı ınfraqurylymy bar ýnıversıtet. Negizi qalanǵannan beri Nazarbaev ýnıversıtetine elimizdiń eń úzdik ulttyq jáne halyqaralyq zertteýshileri shaqyryldy. Búgingi tańda olarǵa óz shyǵarmashylyq qyzmetterin sapaly túrde júzege asyrý úshin barlyq qajetti jaǵdaılar jasalǵan.

Jýyrda Nazarbaev Ýnıversıteti bazasynda Astana Business Campus Innovatsııalyq klasteri quryldy. Atalmysh klaster «Ult jospary - 100 naqty qadam» baǵdarlamasynyń 63-shi qadamyna sáıkes elimizdiń ǵylymdy qajetsinetin ekonomıkasyn qalyptastyrýǵa negiz bolady. Innovatsııalyq klaster Qazaqstanda ınnovatsııalyq kásipkerlikti damytýǵa yqpal etedi.

Esterińizge sala keteıik, Memleket basshysy 2017 jylǵy 31 qańtardaǵy «Qazaqstannyń úshinshi jańǵyrtylýy: Jahandyq básekege qabilettilik» atty Qazaqstan halqyna Joldaýynda el ekonomıkasynyń jedeldetilgen tehnologııalyq jańǵyrtylýy máselesin birinshi basymdyq retinde belgilegen bolatyn. Atalǵan mindetti júzege asyrý úshin Nazarbaev ýnıversıteti óziniń ǵylymı jáne ınnovatsııalyq áleýetin damytý baǵytyndaǵy jumystaryn júzege asyrýda.

Nazarbaev ýnıversıtetinde qurylǵan Astana Business Campus Innovatsııalyq klasterdiń basty maqsaty - ozyq tehnologııalar men jobalardy transfertteý jáne kommertsııalandyrý úshin ǵylymı-zertteý jáne ınnovatsııalyq qyzmet sýbektilerin biriktirý bolyp tabylady. Sondaı-aq, ol Qazaqstanda ınnovatsııalyq kásipkerlikti damytý úshin alańdar qurýdy kózdeıdi.

Búgingi tańda Innovatsııalyq klasterdiń bazasynda Kommertsııalandyrý ofısin, Tehnoparkti jáne Bıznes Inkýbatordy qamtıtyn jobalardy kommertsııalandyrý júıesi quryldy. Bul júıe ınnovatsııalyq jobalardy júzege asyrýǵa múmkindik beredi. Sondaı-aq, olardyń naryqqa shyǵý jolyn qamtamasyz etedi dep kútilýde.

Jobalardy iske asyrýdyń basymdy salalary: robot tehnıkasy jáne AT, bıomedıtsına, energııa tıimdiligi, jańa materıaldar. Qaterli isikterdiń termııalyq ablıatsııasyn ólsheýge arnalǵan optıkalyq-talshyqty temperatýra sensoryn kommertsııalandyrý. Búgingi kúni 10 ınnovatsııalyq kompanııa Tehnoparktiń rezıdentteri bolyp tabylady, olardyń arasynda Ýnıversıtet bazasynda qurylǵan startaptar bar.

Astana Business Campus - bul ǵylymı-zertteý, tájirıbe-konstrýktorlyq jumystardy júrgizýge jáne tehnologııalyq mindetterdi sheshýge arnalǵan, paıdalanýǵa qolaıly zamanaýı úı-jaılar kesheni.

Aıta keteıik, 2016 jyly Bıznes-ınkýbatorda Nazarbaev Ýnıversıtetiniń «ABC Quick Start - 2016» ınnovatsııalyq jobalar akseleratsııasynyń alǵashqy baǵdarlamasy ótkizilgen bolatyn. Al osy jyly Astana qalasy Ákimdiginiń jáne «Astana Innovations» AQ-tyń qoldaýymen ekinshi akseleratsııalyq baǵdarlama ótkiziledi. Búgingi tańda baǵdarlamaǵa qatysý úshin 94 ótinim kelip tústi. Aıta ketý kerek, olardyń arasynan 11 ótinim akseleratsııalyq baǵdarlamadan ótýge iriktelip alyndy. Aatalǵan bǵdarlamanyń negizgi maqsaty - venchýrlyq kompanııalar, korporatsııalar, memlekettik tapsyrys berýshiler jáne, tutas alǵanda, qoǵam úshin mańyzdy joǵary tehnologııalyq jobalar sanyn ósirý esebinen Nazarbaev Ýnıversıteti aýmaǵynda ınnovatsııalyq ortany damytý bolyp tabylady.