Nazarbaev Ýnıversıteti bakalavrıat baǵdarlamasyna oqýǵa qabyldaýdy bastady
ASTANA. 11 sáýir. QazAqparat - Nazarbaev Ýnıversıteti talapkerlerdi bakalavrıat baǵdarlamasyna, sondaı-aq basqa joǵary oqý oryndarynan aýysý arqyly oqýǵa qabyldaý jumystaryn bastady.
Talapkerlerdi tirkeý jumystary aǵymdaǵy jyldyń 15 maýsymyna deıin jalǵasady. Qabyldanǵan stýdentter oqýlaryn 2013 jyldyń kúzinde bastaıtyn bolady. Bul týraly ýnıversıtettiń Kommýnıkatsııa jáne marketıng departamentinen málim etti.
«Byltyr talapkerlerimizge alǵash ret tikeleı túsý - Direct admission jáne basqa JOO-lardan aýysý - Transfer Students Admission baǵdarlamalary boıynsha múmkindikter usyndyq. Nátıjesinde 27 jas oqýǵa qabyldandy, eki stýdent Almaty jáne Petropavl qalalaryndaǵy joǵary oqý oryndarynan aýysyp, óz oqýlaryn jalǵastyrdy», - dep atap ótti Nazarbaev Ýnıversıteti Qabyldaý departamentiniń dırektory Dınara Ashyqbaeva.
Byltyr atalmysh JOO Ýnıversıtetaldy daıyndyq baǵdarlamasy (Foundation) boıynsha oqytýsyz, bakalavrıat baǵdarlamasyna stýdentterdi tikeleı qabyldaı bastady. Oqýǵa túskisi keletinder úshin Oqýǵa qabyldaý erejeleri men nusqaýlyqtar ýnıversıtettiń saıtynda ornalastyrylǵan. Barlyq talapkerlerge onlaın-tirkeýden ótý qajet. Ýnıversıtet halyqaralyq jáne respýblıkalyq pán olımpıadalarynyń jeńimpazdaryna oqýǵa túsýdiń arnaıy sharttaryn bıyl da usynyp otyr.
Búgingi kúni Nazarbaev Ýnıversıtetinde 1500-ge jýyq stýdent bilim alýda. Ýnıversıtettiń alty mektebi bakalavrıat jáne magıstratýra baǵdarlamalary boıynsha akademııalyq baǵdarlamalardy usynady.
