Nazarbaev ýnıversıteti Almaty mektepterine bilim sertıfıkatyn tapsyrdy

Esterińizge sala keteıik, 2009-2010 oqý jyly Nazarbaev ýnıversıtetine oqýǵa túsken stýdentterdiń bilim alý nátıjesi boıynsha qazaqstandyq mektepterdiń reıtıngi ázirlengen bolatyn. Bul reıtıng boıynsha Aqtóbe qalasyndaǵy er balalarǵa arnalǵan qazaq-túrik lıtseıine - birinshi, Almaty qalasyndaǵy № 165-shi tehnıkalyq lıtseıine - ekinshi, №134-shi gımnazııaǵa - úshinshi oryn berilgen bolatyn. Birinshi oryn ıegeri Aqtóbe qalasyndaǵy er balalarǵa arnalǵan qazaq-túrik lıtseıine atalǵan sertıfıkat 5 aqpanda tapsyrylǵan bolatyn.

Sertıfıkatty tapsyrǵan Nazarbaev ýnıversıtetiniń ókili Qadısha Daıyrovanyń aıtýynsha, reıtıng boıynsha 10 mektep anyqtalǵan. Onyń alǵashqy úshtigine sertıfıkat tapsyrylyp otyr. «Sertıfıkat 2009-2010 oqý jyly Nazarbaev ýnıversıtetine túsken oqýshylardyń sany men olar kórsetken bilim sapasyna qaraı baǵalanyp otyr. Mysaly búgin 2-oryn sertıfıkatyn alǵan № 165-shi tehnıkalyq lıtseıdiń 5 oqýshysy ýnıversıtettiń úzdik stýdenti», - dedi ol.

Tehnıkalyq lıtseıdiń dırektory Erbol Baekovtyń aıtýynsha, Nazarbaev ýnıversıtetiniń sertıfıkaty bıyl qurylǵanyna 20 jyl tolatyn bilim ordasy ustazdarynyń eńbegine kórsetilgen qurmet. «Bizdiń oqýshylarymyz táýelsizdik alǵan jyldary shet elge oqýǵa attanatyn. Keıin shet eldik bilim deńgeıine saı QBTÝ, ІT-ýnıversıtet qurylǵan soń osy oqý oryndaryna shaqyrtý ala bastady. Byltyrǵy jyldan beri Nazarbaev ýnıversıtetinde bilim alýda. Barlyq oqý ornynda bizdiń túlekterimiz joǵary bilim sapasyn kórsetýde. Sonyń kýási - búgingi sertıfıkat», - deıdi mektep dırektory.