«Nazarbaev Ýnıversıteti» 34 ınnovatsııalyq jobamen aınalysýda
ASTANA. 12 maýsym. QazAqparat - «Nazarbaev Ýnıversıteti» qazaqstandyq ǵylymdy damytýdyń qozǵaýshy kúshine aınalyp otyr.
Búginde joǵary oqý ornynda synaqtan ótkizilip jatqan ǵylymı jobalar keıinnen ınnovatsııalyq óndiriske engiziletin bolady. Ýnıversıtette jańartylatyn energııa, jel energııasy, aqparattyq tehnologııa, mehatronıka jáne robototehnıka, klınıkalyq emhana jáne t.b. salalar boıynsha zertteýler júrgizilýde, dep habarlady pm.kz saıty.
«Nazarbaev Ýnıversıtetiniń tóńireginde transfert pen jańa tehnologııalar qurýǵa yqpal etetin ınnovatsııalyq-zııatkerlik klaster qalyptasýy tıis. Astanada joǵary tehnologııaly kásiporyndar qura otyryp, biz bul tájirıbeni Qazaqstannyń basqa da ǵylymı-bilim berý ortalyqtaryna taratatyn bolamyz»,- dedi Elbasy N.Nazarbaev «Áleýmettik-ekonomıkalyq jańǵyrtý - Qazaqstan damýynyń basty baǵyty» atty Qazaqstan halqyna Joldaýynda.
Qazirgi tańda «Nazarbaev Ýnıversıtetinde» ǵylymı qyzmetpen úsh zertteý ortalyǵy: Bilim saıasaty ortalyǵy, Tirshilik týraly ǵylymdar ortalyǵy, Energetıkalyq zertteýler ortalyǵy, sondaı-aq Ǵylym jáne tehnologııalar mektebi, Injenerııa mektebi jáne Gýmanıtarlyq jáne áleýmettik ǵylymdar mektebi aınalysýda.
Joǵary oqý ornynda jańartylatyn energııa, jel energetıkasy, aqparattyq tehnologııalar, mehatronıka jáne robototehnıka, qorshaǵan ortany qorǵaý, fızıkalyq hımııa, elektrohımııa, klınıkalyq medıtsına, bıomedıtsına jáne t.b. salalar boıynsha zertteýler júrgizilýde. Aǵymdaǵy jyly granttyq zertteý jobalaryn iske asyrý jumysy bastaldy, oqý ornynda barlyǵy 34 ǵylymı joba iske asyrylýda.
Tirshilik týraly ǵylym ortalyǵynda dárilik zattardyń klınıkalyq júıesin qurý jónindegi zertteýler júrgizilýde. Bul joba aýyr ınfektsııalar jaǵdaıynda antıbıotıkterdi nysanaly jetkizýdiń jańa júıesin qurýǵa múmkindik beredi. Oǵan qosa, balalardyń tynys aýrýlaryn emdeýdiń jańa ádisi, sharananyń damýyndaǵy tejelýdi túzetýdiń múmkindigi zerttelýde.
Al Energetıkalyq zertteýler ortalyǵynda elimizde áleýetti qoldanylatyn zııatkerlik energetıkalyq jelilerge arnalǵan tehnologııalar zerttelýde, ekinshi jáne úshinshi býyn fotoelementterin zertteý zerthanalary qurylýda, Qazaqstannyń energetıkalyq júıesiniń modeli jasalýda.
Al Bilim saıasaty ortalyǵy Qazaqstannyń jalpy bilim beretin orta mektepteri men joǵary oqý oryndarynyń oqý baǵdarlamalaryn úılestirýmen aınalysady, áleýmettik-ekonomıkalyq jahandaný jaǵdaıyndaǵy bilim men ǵylym júıesiniń ınternatsıonaldaný úrdisine taldaý júrgizedi.
Aıta ketý kerek, bul ǵylymı jobalarmen jetekshi qazaqstandyq jáne sheteldik ǵalymdar óz salalarynda kóshbasshy bolyp tabylatyn álemdik ǵylymı ortalyqtarmen birlesip aınalysýda.
Jalpy alǵanda, ınnovatsııalyq bilim jáne ǵylym jobalaryn engizýdiń arqasynda «Nazarbaev Ýnıversıteti» álemdik zertteý ýnıversıtetteriniń úzdik tájirıbesine saı keletin ǵylymı qyzmetti óristetýde. Ǵylymı zertteýlerdi damytý Qazaqstan úshin jańa bilim júıesin qurýǵa jáne otandyq ǵylymdy halyqaralyq deńgeıge kóterýge múmkindik beredi.
