Nazarbaev Ýnıversıteti 2013 jyly 90 memlekettik qyzmetshiniń biliktiligin arttyrmaqshy
ASTANA. 26 sáýir. QazAqparat - Nazarbaev Ýnıversıtetiniń Joǵary memlekettik saıasat mektebi QR memlekettik qyzmetshilerdiń basshylyq quramyna arnalǵan biliktilikti arttyrý baǵdarlamasy boıynsha tyńdaýshylardyń jańa toptaryn oqyta bastady. Bıyl basshylyq quramnyń 90 memlekettik qyzmetshisi mektepte bilim alatyn bolady.
Atalǵan kýrs baǵdarlamasyna osy joly zeınetaqy júıesin jańǵyrtý, qarjy menedjmentin júrgizý, adam kapıtalyn damytý, básekege qabilettilikti arttyrý jáne ınnovatsııalardy engizý máseleleri kirip otyr. «Kýrstyń oqý baǵdarlamasy Qazaqstannyń qajettiligin eskere otyryp, elimizdiń úkimet tarapynan berilgen usynystarǵa sáıkes ázirlengen bolatyn. Biz teorııany praktıkamen úılestiremiz. Oqý barysynda bizdiń tyńdaýshylarymyz halyqaralyq tájirıbeden alynǵan naqty keısterdi zertteıtin bolady», - dep atap ótti Baǵdarlamanyń lektory, Djon F. Kennedı atyndaǵy Garvardtyń memlekettik basqarý ınstıtýtynyń professory Fadı Fara.
Sonymen qatar Nazarbaev Ýnıversıtetiniń Joǵary memlekettik saıasat mektebi memlekettik saıasat salasyndaǵy eki jyldyq magıstratýra baǵdarlamasyna talapkerlerdi qabyldaý jumystaryn bastady. Mekteptiń strategııalyq áriptesi Sıngapýrdyń Ulttyq Ýnıversıtetiniń Lı Kýan ıÝ atyndaǵy Memlekettik saıasat mektebi bolyp tabylady.
Magıstratýra baǵdarlamasy eń aldymen jas kásipqoılarǵa baǵyttalǵan. 2013 jyly magıstranttarǵa oqý, Astana qalasynda turý shyǵyndaryn, sondaı-aq Lı Kýan ıÝ atyndaǵy Memlekettik saıasat mektebiniń bazasynda ótetin úsh aptalyq oqý modýlin qamtıtyn 20-ǵa jýyq memlekettik bilim berý granttary bólinip otyr. Sondaı-aq stýdentter aı saıyn stıpendııa alatyn bolady. Qujattardy qabyldaý aǵymdaǵy jyldyń 31 mamyryna deıin júrgiziledi. Nazarbaev Ýnıversıteti men Lı Kýan ıÝ atyndaǵy Memlekettik saıasat mektebiniń ókilderinen quralǵan qabyldaý komıssııasy úmitkerlerdi irikteıtin bolady.
Joǵary memlekettik saıasat mektebinde atap ótkendeı, Nazarbaev Ýnıversıteti elimizdiń memlekettik qyzmet salasyndaǵy basshylardy oqytýmen birge jańa kásipqoılarǵa halyqaralyq deńgeıdegi bilimdi usyna otyryp, memlekettik sektordaǵy ulttyq kadrlardy damytýǵa óziniń eleýli úlesin qospaqshy.
