Nazarbaev ýnıversıteti men mektepteri qoǵamdyq baqylaýda bolady
Búgin Senattyń jalpy otyrysynda «Qoǵamdyq baqylaý týraly» Zańy men ilespe qujat maquldandy, dep habarlaıdy QazAqparat tilshisi.
Zańda qoǵamdyq baqylaý salasyn memlekettik retteý tártibin belgileý, qoǵamdyq baqylaýǵa qoıylatyn talaptardy aıqyndaý, qoǵamdyq baqylaý obektileri men sýbektileriniń quqyqtary men mindetterin reglamentteý eskerilgen.
Zańnyń maqsaty - Qazaqstan Respýblıkasy azamattarynyń qoǵamdyq baqylaý arqyly memleket isterin basqarýǵa qatysýyn qamtamasyz etý.
«Atalǵan zańdar memlekettik organdardyń, kvazımemlekettik sektordyń ashyqtyq dárejesin keńeıtip, azamattardyń qoǵamdyq belsendiligin arttyrýǵa baǵyttalǵan. Birinshiden, zańda qoǵamdyq baqylaý uǵymy, qoǵamdyq baqylaýdyń maqsaty men basty qaǵıdattary aıqyndalady. Ekinshiden, qoǵamdyq baqylaýdy iske asyratyn qoǵamdyq baqylaý sýbektileri jáne qoǵamdyq baqylaý obektileri aıqyndalady jáne olardyń quqyqtary men mindetteri naqtylanady. Máselen, qoǵamdyq baqylaý sýbektileri qoǵamdyq baqylaý toptaryn qurýǵa, sarapshylardy tartýǵa, sondaı-aq, aqparat suratýǵa, qoǵamdyq baqylaý obektileriniń áreketterine nemese áreketsizdigine shaǵymdanýǵa jáne basqa da qadamdarǵa quqyly bolady», - dedi senator Rýslan Rústemov.
Qoǵamdyq baqylaý obektileri qoǵamdyq baqylaý nysandarynyń usynymdaryn qaraýǵa jáne olardy ınternet-resýrstarda ornalastyrýǵa, múddeler qaqtyǵysyn boldyrmaýǵa, qaýipsizdik sharalaryn saqtaýǵa mindetti bolady.
«Qoǵamdyq baqylaýdyń negizgi formalary retinde qoǵamdyq monıtorıng, qoǵamdyq saraptama, qoǵamdyq tyńdaý usynylady.
Sonymen qatar, zańda qoǵamdyq baqylaýdy júzege asyrýǵa qatysý sharttary aıqyndalǵan. Qoǵamdyq baqylaýdy júzege asyrýǵa on segiz jasqa tolmaǵan, sottylyǵy ótelmegen, narkologııalyq nemese psıhıkalyq esepte turǵan adamdar jiberilmeıdi. Munymen qosa, qyzmetinde sheteldiń qatysy bar, qoldanystaǵy zańnamaǵa sáıkes qyzmeti toqtatylǵan nemese tyıym salynǵan kommertsııalyq emes uıymdarǵa shekteý qoıylady», - dedi depýtat.
Atap aıtqanda, qoǵamdyq baqylaý nátıjelerin qaraý normalary bekitildi. Osylaısha, qoǵamdyq baqylaý obektileri qoǵamdyq baqylaý nátıjeleri boıynsha qorytyndy qujatty 10 kún merzimde qarap jáne dáleldi jaýap jiberýi kerek. Bul rette qoǵamdyq baqylaý obektileri mán-jaılardy jan-jaqty, tolyq jáne obektıvti qaraý úshin sharalar qoldanýǵa mindetti.
Budan ári qoǵamdyq baqylaý júrgizý tártibin retteıtin «Qazaqstan Respýblıkasynyń keıbir zańnamalyq aktilerine qoǵamdyq baqylaý, ákimshilik rásimderdi jetildirý máseleleri boıynsha ózgerister men tolyqtyrýlar engizý týraly» ilespe zańda petıtsııa ınstıtýtyn reglamentteý jónindegi túzetýler qamtylǵan. Birinshiden, zańnamada petıtsııa uǵymy bekitildi. Petıtsııa – memlekettik organǵa, jergilikti ókildi jáne atqarýshy organǵa elektrondyq qujat nysanynda jiberilgen jáne QR Ákimshilik rásimdik-protsestik Kodekste belgilengen tártippen qaralatyn ujymdyq habar, ún qosý nemese usynys.
Ekinshiden, Ákimshilik rásimdik-protsestik kodekste petıtsııalardy berý jáne qaraý tártibi bekitiledi. Úshinshiden, petıtsııany Qazaqstan Respýblıkasynyń azamattary arnaıy ınternet portal arqyly bere alady. Tórtinshiden, ýákiletti organ petıtsııa jarııa bolǵansha onyń zańda bekitilgen sharttarǵa sáıkestigin anyqtaıdy.
Petıtsııany mindetti túrde qaraý úshin ony qoldaıtyn daýystardyń shekti mánderi anyqtalady:
- aýdandyq deńgeı (ákimdikter quzyretine jatatyn máseleler boıynsha) halqy 50 myńnan asatyn bolsa, 2,5 myń daýys, qalǵandary úshin halyq sanynyń keminde 5 paıyzy bolýy kerek.
- aýdandyq deńgeı (máslıhattar quzyretine jatatyn máseleler boıynsha) – halqy 50 myńnan asatyn bolsa, 5 myń daýys, qalǵandary úshin halyq sanynyń keminde 10 paıyzy bolýy kerek;
- oblystyq deńgeı (ákimdikter quzyretine jatatyn máseleler boıynsha) – tıisti ákimshilik-aýmaq turǵyndarynyń 1% daýysy bolýy kerek
- oblystyq deńgeı (máslıhattar quzyretine jatatyn máseleler boıynsha) – tıisti ákimshilik-aýmaq halqynyń keminde 2 % bolýy kerek;
- respýblıkalyq deńgeı (Úkimet quzyretine jatatyn máseleler boıynsha) – keminde 50 myń daýys bolýy kerek.
Senat málimetine qaraǵanda, búgin maquldanǵan zań aıasynda «Nazarbaev Ýnıversıteti», «Nazarbaev Zııatkerlik mektepteri» jáne «Nazarbaev Qory» mártebesi týraly» Zańǵa ýnıversıtette, zııatkerlik mektepterde qoǵamdyq baqylaý «Qoǵamdyq baqylaý týraly» QR Zańyna sáıkes júzege asyrylatyny týraly norma engizildi.
