Nazarbaev Ýnıversıteti depýtattar aldynda esep berdi
ASTANA. KAZINFORM – Parlament Májilisiniń depýtaty Ashat Aımaǵambetov jetekshilik etetin Áleýmettik-mádenı damý komıtetiniń otyrysynda depýtattar Nazarbaev Ýnıversıtetiniń 2025 jylǵy esebin tyńdady.
Ýnıversıtet esebi men jańa strategııasyn depýtattarǵa Nazarbaev Ýnıversıteti prezıdenti professor Vakar Ahmad tanystyrdy. Onyń aıtýynsha, «Qazaqstannan shyqqan álemdik deńgeıdegi ýnıversıtet» strategııasynda qazaqstandyq bilim salasyn halyqaralyq deńgeıde ilgeriletýge basymdyq berilgen.
— Nazarbaev Ýnıversıteti — elimizdiń bilim berý salasyndaǵy flagmany jáne maqtanyshy. Mundaǵy bilim sapasy men ǵylymı áleýetti saqtap qalý — memlekettik mańyzy bar mindet. Ýnıversıtettiń biregeı zerthanalaryn, ınfraqurylymyn jáne ǵylymı áleýetin tek «ómir súrý» deńgeıinde emes, damý deńgeıinde qarjylandyrý qajet, — dep Ashat Aımaǵambetov ýnıversıtettiń ashyq bolýǵa degen umtylysyn erekshe atap ótti.
Ýnıversıtetke degen senimniń joǵary ekeniniń birden-bir dáleli — oqýǵa túsýge ótinish berýshiler sanynyń jyl saıyn artýy. Prezıdenttiń málimetinshe, bıylǵy mamyr aıynda 12 myń talapker ótinish tapsyrǵan. Sondaı-aq álemdegi saıası turaqsyzdyqqa baılanysty jaqyn jáne alys shet elderden Nazarbaev Ýnıversıtetine aýysqan stýdentter sany da kóbeıip keledi.
— Qazaqstanda tsıfrlyq transformatsııa, jasandy ıntellekt jáne turaqty ınfraqurylymdy damytý ulttyq basymdyqtar retinde aıqyndaldy. Memleket basshysy belgilegen osy baǵyttarǵa sáıkes, bıylǵy tamyz aıynan bastap Nazarbaev Ýnıversıteti jańa Kompıýterlik ǵylymdar jáne jasandy ıntellekt mektebin (SCAI) iske qosady. Mekteptiń qyzmeti kompıýterlik ǵylymdar, robototehnıka, kıberqaýipsizdik jáne jasandy ıntellekt salalaryna baǵyttalady. Ýnıversıtet eńbek naryǵynda suranysqa ıe mamandar daıarlaýdy maqsat etedi, — dedi Vakar Ahmad.
Oǵan qosa qarjylandyrý máselesine erekshe nazar aýdaryldy. Usynylǵan málimetterge sáıkes, qazirgi tańda memleket tarapynan Nazarbaev Ýnıversıtetine túsý úshin talapkerlerge bólinetin granttar ýnıversıtet kiristeriniń qurylymynda 50%. Ýnıversıtet basshylyǵynyń aıtýynsha, búginde joǵary oqý orny demeýshilik qarajat tartý, aqyly bilim berý qyzmetterin usyný jáne halyqaralyq ǵylymı granttar esebinen qarjylyq derbestikke umtylyp otyr.
Sonymen qatar, Prezıdenttiń aıtýynsha, ýnıversıtetke túsýge nıettiler sany turaqty túrde ósip keledi. Bıyl bakalavrıat granttaryna konkýrs bir orynǵa 10 adam. Tipti aqyly oqýǵa da barlyq talapkerge oryn jetispeı jatyr.
Bul Nazarbaev Ýnıversıtetindegi bilim sapasy men túlekterdiń eńbek naryǵyndaǵy joǵary suranysqa ıe ekenine baılanysty. Esep derekterine sáıkes, túlekterdiń 98%-y oqý bitirgen alǵashqy jyldyń ishinde jumysqa ornalasady. Al 12 myń túlektiń 92%-y Qazaqstanda qalyp, eńbek etedi.
Baıandamanyń barysynda ýnıversıtettiń halyqaralyq reıtıngterdegi kórsetkishteri de jaqsarǵany aıtyldy. Atap aıtqanda, Times Higher Education reıtınginde ýnıversıtet álemdik oqý oryndary arasynda joǵary pozıtsııaǵa ıe bolyp, Ortalyq Azııa men Kavkaz óńirinde birinshi orynǵa shyqqan. Sondaı-aq TMD elderi ýnıversıtetteri arasynda tórtinshi oryndy jáne túrki memleketteri joǵary oqý oryndary arasynda jetekshi pozıtsııalardyń birin ıelengen.
