Nazarbaev: Úmit artqan keıbir jastardyń qaqpanǵa túsip jatqany qobaljytady
Otandyq BAQ ókilderimen kezdesý barysynda Prezıdentke «Senim artqan jastardyń keıbiri úmitińizdi aqtaı almaǵan kezder boldy ǵoı... Jastarǵa degen senimińizdi joǵaltyp alǵan joqsyz ba?» degen suraq qoıyldy.
«Qazir mynaý aqparattyq kezeńniń ózi, tsıfrlandyrý - bul jastardyń jumysy. Jastar tez ilip áketedi. Jastar basqasha jaǵdaıda oqydy. Basqasha zamanda ómir súrip jatyr. Jastarǵa senbeı kimge senemiz? Solaı boldy eken dep búkil jastardyń barlyǵyna senbeý kerek dep aıtýǵa bolmaıdy. Báribir de jastarǵa senemin. Bolashaq solardyń qolynda. Solarǵa senemiz, solardy qoıamyz», - deıdi el Prezıdenti.
Elbasy óz sózinde qazir 35 jastaǵy adamdy jas dep aıtýǵa bolmaıtynyn atap ótti.
«35 jastaǵy adam oqýyn bitirdi. Tájirıbe aldy. Kóp jerde jumys atqardy. Qandaı laýazymǵa bolsa da qoıýǵa bolady. Al biraq sol jigitter men qyzdar úmitińdi aqtamaı, óz-ózinen baryp qaqpanǵa túsip jatsa, árıne, bul óte qobaljytatyn jaǵdaı. Sondyqtan, senimdi aqtap, Otanyńa jumys isteý kerek. Adal bolsań baqytqa jetesiń. El-jurt syılaıdy. Aǵaıyn-týysqanyń, bala-shaǵań rıza bolady. Áli de sene beremiz. Áli de jastardy qoıa (qyzmetke - red.) beremiz», - deıdi Nursultan Nazarbaev.
Memleket basshysy búgingi tańda Qazaqstannyń bıligindegi adamdardyń ishinde de jastardyń úlesi kóp ekenin atady.
«Búgingi Úkimettiń músheleri, mınıstrlerdiń jasy - qyryqtyń tóńireginde. Odan da jastary júr. 35 jastaǵy mınıstrlerimiz bar. Oblys ákimderi bar. Bolashaq baǵdarlamasy boıynsha shetelde oqyp kelgen 12 myń órendi atap ótýge bolady. Sondyqtan, jastarǵa senemiz. Jastar úmitti aqtasyn», - dep túıdi Elbasy.
Eske sala ketsek, 22 jeltoqsan kúni Elbasy Nursultan Nazarbaev elimizdegi jetekshi BAQ ókilderine 2017 jyldy qorytyndylaýǵa arnalǵan suhbat berdi. Onda Prezıdent qazaq qoǵamyndaǵy eleýli ózgerister men ózekti máseleler týraly jýrnalıster suraǵyna jaýap berdi. Atalmysh suhbattyń televızııalyq nusqasy búgin respýblıkalyq telearnalardyń efırinen kórsetildi.
