Nazarbaev Úkimet múshelerine: Qoryqsańdar nesine mınıstr bolasyńdar
ASTANA. QazAqparat - Mınıstrler derbes sheshim qabyldaýda jaýapkershilikti moıyndaryna alýlary kerek. Bul týraly búgin Úkimettiń keńeıtilgen májilisinde QR Prezıdenti Nursultan Nazarbaev aıtty, dep habarlaıdy QazAqparat.
«Árbir basshy jaýapkershilikti syrǵytpaı óz moınyna alýy kerek. Biz bul týraly ana jyly Úkimetti qaıta uıymdastyrǵanda aıtqanbyz. Vıtse-premerler, mınıstrler sanyn qysqartqanda aıttyq. Ár mınıstr ózi buıryq shyǵarady, ózi sony oryndaıdy, ózi jaýap beredi. Bıýdjetke qazirden bastap kirisesińder, ár mınıstrlikke, ár óńirge aqsha bólinedi. Sony alamyz dep tyrmysyp qanshama jumys istep, dáleldedińder, aldyńdar. Endi sonyń bárin alyp uqsatyńdar, jetkizińder. Sodan keıin jaýap berińder. Másele sonda. Jaýapkershilik sondaı. Biraq, qarap otyrsań, Abaı aıtqandaı «Baıaǵy jartas, bir jartas». Báribir mınıstrler keledi de Premer-Mınıstrge hat jazady, maǵan jazady. Vıtse-premerler bar, olarǵa hat jazady. Ózine jaýapkershilik almaıdy. Ondaı qorqaq bolsańdar mundaı jumysqa nege kelesińder? Basqa jerge baryńdar. Qaǵazǵa qol qoımaıtyn jumystar bar, orynbasarlar bar. Bızneske baryńdar», - dedi Elbasy Úkimet múshelerine qarata.
Sonymen qatar Qazaqstan Prezıdenti mınıstrler derbes sheshim qabyldaýdan jasqanbaýy, jaýapkershilikti moıyndaryna alýy qajettigin basa aıtty.
«Eń birinshi maqsat memleket maqsat-múddesin basshylyqqa alyp, sony oryndaý. Bul jóninde, úshinshi jańǵyrý jónindegi Joldaýda atalǵan maqsattarǵa qalaı qol jetkizý kerektigin aıtyp berdim», - dedi Nursultan Nazarbaev.
