Nazarbaev tabıǵat apatyna baılanysty Qyrǵyzstan Prezıdentine kóńil aıtty

ASTANA. QazAqparat - Qazaqstan Respýblıkasynyń Prezıdenti Nursultan Nazarbaev Qyrǵyz Respýblıkasynyń Prezıdenti Almazbek Atambaevqa kóńil aıtý jedelhatyn joldady, dep habarlaıdy Aqordanyń baspasóz qyzmeti.

Qazaqstan Prezıdenti Osh oblysynda laı kóshkini saldarynan adamdardyń qaza bolǵany týraly habardy zor kúızelispen qabyldady.

Memleket basshysy barsha Qazaqstan halqynyń jáne jeke óziniń atynan qaza bolǵandar otbasylarynyń qaıǵysyna ortaqtasa otyryp, kóńil aıtty.

Eske sala ketsek, Qyrǵyzstan TJM-nyń habarlaýynsha , 29 sáýir kúni shamamen saǵat 07:20-da Ózgen aýdany Zerger aýyldyq okrýginiń Aıý aýyly mańynda jalpy kólemi shamamen 1 mln tekshe metr bolatyn laı kóshkini júrdi. Laı kóshkini bastapqy derek boıynsha 6 úıdi basyp qaldy. Oqıǵa ornyna 33 adamnan quralǵan qutqarý toby jáne azamattyq qorǵaý boıynsha komıssııa músheleri jumys isteýde.