Nazarbaev Sırııa daǵdarysyn sheshý jolyn aıtty
ASTANA. QazAqparat - Lańkestik pen musylmannyń arasynda eshqandaı da teńdik joq. «CNBC Arabia» telearnasyna suhbat bergen Qazaqstan Prezıdenti Nursultan Nazarbaev osylaı málim etti, dep habarlaıdy QazAqparat.
Suhbat barysynda telearna tilshisi QR Prezıdentinen: «Ózińiz atap ótkendeı, Sırııa máselesi óte kúrdeli. Áli sheshimin tapqan joq. Sizdiń oıyńyzsha, Sırııadaǵy daǵdarys jaqyn arada óz sheshimin taba ma álde uzaqqa sozyla ma?» - dep surady.
Bul saýalǵa oraı Memleket basshysy Sırııa daǵdarysyn sheshý úshin barlyq múddeli memleketter kelisip, bir jerden sóz shyǵarý qajettigin, sol arqyly ǵana naqty nátıjege qol jetkizýge bolatynyn basa aıtty.
«Ásirese, aralasyp jatqan úlken memleketter. Ókinishke oraı, árqaısysy ózderiniń múddesin qalap, ár túrli jaǵdaımen kirisedi. Árqaısysynyń ishinde óz múddesi bar. Lańkestikke qatysyp júrgen adamdar sony qoldanady. Birine birin qarsy qoıady. Sol qaıshylyqtan ózderine oryn tabady. Sondyqtan, meniń usynysym - BUU aıasynda búkil dúnıejúzilik qoǵamdastyq birlesip lańkestikke qarsy turyp, Sırııanyń máselesin sheshýi kerek. Basqa jol joq dep sanaımyn. Sebebi, bul barlyq memleketterge qaýip. Bizdi bilmeıtin basqa dúnıe, Batys elderi munyń barlyǵy musylmandardan shyǵyp otyr dep oılaıdy. Lańkestik pen musylmannyń arasynda eshqandaı da teńdik joq. Barlyq elder birigip qarsy shyqsa ony jeńýge bolady»,- dedi Nazarbaev.
