Nazarbaev saılaýdy majorıtarlyq júıemen ótkizý kerek deıtinderge jaýap berdi

NUR-SULTAN. QazAqparat – Máslıhattyń kelesi saılaýy partııalyq tizim boıynsha ótedi. Bul týraly «Nur Otan» partııasy Saıası keńesiniń keńeıtilgen otyrysynda QR Tuńǵysh Prezıdenti – Elbasy Nursultan Nazarbaev aıtty, dep habarlaıdy QazAqparat tilshisi.

«2018 jyly saılaý zańnamasyn jetildirdik. Máslıhattardyń kelesi saılaýy alǵash ret partııalyq tizim boıynsha ótkizileıin dep otyr. Máslıhattyń kelesi saılaýy Májilistegideı partııalyq tizimmen ótedi. Jekelegen opponentterdiń nemese blogerlerdiń merziminen buryn Parlament saılaýynda majorıtarlyq júıesine oralýdy jáne taǵy basqalardy usynyp jatqanyn estip otyrmyz. Búgin mundaı sóz sóıleýshilerge jaýap berý qajet», - dedi Elbasy.

Qazaqstan Tuńǵysh Prezıdenti saılaýdyń majorıtarlyq júıesine kóshýdi qoldap júrgenderdiń naqty usynystary joq ekendigin basa aıtty.

«Bul jerde negizdi argýmentteri joq, ádettegideı tek qana áńgime ǵana. Bılikti synap sóılegenderi bos sóz ǵana. Tym bolmasa bireýi qalaı isteý kerektigin usynyp, qalaı jasaý kerektigin kórsetse ǵoı. Demokratııanyń shamshyraǵy dep júrgen Eýropadaǵy 30 damyǵan eldiń qataryna kiretin memleketterdiń 63 paıyzy saılaýdy proportsıonaldy júıemen ótkizedi», - dedi Nursultan Nazarbaev.

Elbasynyń aıtýynsha, majorıtarlyq júıedegi saılaý negizinen Azııa elderine tán bolyp keledi.

«ıAǵnı, proportsıonaldy júıe úzdik álemdik demokratııalyq tájirıbege tolyq saı keledi. Saıası júıeni nyǵaıtýǵa, demokratııany damytýǵa septigin tıgizip, tolyqtaı alǵanda saıası partııanyń qyzmetin jandandyrady», - dedi elimizdiń Tuńǵysh Prezıdenti.