Nazarbaev pen Rýhanı shaǵyn quramda kelissóz ótkizip jatyr

ASTANA. QazAqparat - Aqordada Elbasy Nursultan Nazarbaev pen Iran Islam Respýblıkasynyń prezıdenti Hasan Rýhanı arasynda shaǵyn quramdaǵy kelissóz ótýde, dep habarlaıdy QazAqparat.

Qazaqstanǵa resmı saparmen kelgen Iran Prezıdentin Aqordada Nursultan Nazarbaev qarsy alyp, taraptar bir-birine óz elderiniń Úkimet múshelerin tanystyrdy. Kelesi kezekte Qazaqstan Prezıdenti men mártebeli meıman arnaıy daıyndalǵan minberge kóterilip, eki eldiń ánurandary shyrqaldy. Osydan keıin prezıdentter saltanatty jaǵdaıǵa oraı sap túzegen qurmet qaraýylynyń aldymen júrip ótip, shaǵyn quramdaǵy kelissózder ótkizý zalyna kirdi.

Shaǵyn quramdaǵy kelissózden keıin taraptardyń keńeıtilgen quramdaǵy kelissózderi kútilýde. Kelissózder qorytyndysyna oraı Qazaqstan men Iran birinshi basshylarynyń birlesken málimdemesi men ekijaqty yntymaqtastyq qujattaryna qol qoıý josparlanǵan.