Nazarbaev óz maqalasy arqyly Reseıge keńes berip otyr - sarapshy Nursha
ASTANA. QazAqparat - Búgin «Qazaqstan - Reseı» sarapshylar forýmynda QR Prezıdenti Nursultan Nazarbaevtyń «Bolashaqqa baǵdar: rýhanı jańǵyrý» maqalasynda aıtylǵan ózekti bir másele aıtyldy. Ol Reseı Federatsııasyna da tikeleı qatysy bar, dep habarlaıdy QazAqparat tilshisi.
QR Tuńǵysh Prezıdentiniń qory janyndaǵy álemdik ekonomıka men saıasat ınstıtýtynyń mamany Asqar Nurshanyń aıtýynsha, búginde Nursultan Nazarbaevtyń maqalasyn árkim ózine jaqyn máselelerdiń turǵysynan topshylaıdy. Biraq, atalǵan maqalada Qazaqstannyń ótken-ketken tarıhqa qatysty kompromısti ustanymy kórinis taýyp otyr. «Máselen, qazirgi kezde XX ǵasyrǵa qatysty ekijaqty tarıhı kózqaras bar. Bireýler ony «kollonıalızm dáýiri - asharshylyq pen ult qaımaqtarynyń qyrylǵan ýaqyty, sosyn ekologııalyq apattardyń kezeńi» dese, endi bireýler sol kezdegi ındýstrıalızatsııany, tyń ıgerý men halyqtar dostyǵyn alǵa tartady. Bylaısha aıtqanda, bir jaǵy - negatıv, ekinshi jaǵy - pozıtıv. Prezıdent bolsa, ótken tarıhqa qaraýdyń kompromısti jolyn usynyp otyr. Onyń aıtýynsha, tarıhtyń qaterli tustaryn joqqa shyǵarmaı, oń tájirıbeniń bar ekenin moıyndaýymyz qajet. Qazaqstan men Reseı arasyndaǵy qarym-qatynastarda da sondaı «formýla» bolýy tıis. Negizi, reseılikter ony jaqsy túsinedi. Alaıda Eýropa men Ýkraınamen qyzý pikirtalasqa túskende ótken tarıhty tolyǵymen qorǵap shyǵýǵa tyrysady. Tarıhtyń qaterli betterin moıyndaý qajet. Odan Eýropanyń derjavalary da ótti. Áıtpese, tarıhtyń sol bir qaterli tustary bárimizdi tyǵyryqqa tirep, únemi bas aýrýymyzǵa aınalyp otyrady», - dedi Nursha búgin Astanada ótken «Qazaqstan - Reseı» sarapshylar forýmynda.
Aıta keteıik , Qazaqstan - Reseı sarapshylar forýmy Qazaqstannyń xalyqaralyq qatynastar keńesi, "Valdaı" pikirtalas klýby men "Parasat" júıeli zertteýler ınstıtýtynyń bastamasymen ótip otyr. Sessııa kezinde sóz alǵan qazaq-qytaı yntymaqtastyǵy jónindegi "China Center" xalyqaralyq ortalyǵynyń bas dırektory Ádil Káýkenov Uly Jibek joly jobasyna qatysty birqatar mańyzdy máselelerdi kóterdi.5 Al QR Tuńǵysh Prezıdentiniń qory janyndaǵy álemdik ekonomıka men saıasat ınstıtýtynyń mamany Asqar Nursha Qazaqstan men Reseı arasyndaǵy saýda-sattyqtyń tepe-teńsizdigine toqtaldy .
