Nazarbaev Ortalyǵynda búgin Memleket basshysynyń «Erkin eldiń erteńi» atty kitabynyń tanystyrylymy bolady

ASTANA. 1 jeltoqsan. QazAqparat - Búgin Astanadaǵy Nazarbaev Ortalyǵynda Elbasy Nursultan Nazarbaevtyń «Erkin eldiń erteńi» atty kitabynyń tusaýkeseri ótedi.

Tanystyrylym rásimine QR Prezıdenti Keńsesiniń bastyǵy Mahmud Qasymbekov, Halyqaralyq «Bolashaq» baǵdarlamasynyń túlekteri, Astana qalasy orta mektepteriniń oqýshylary qatysady.

«Erkin eldiń erteńi» jastarǵa arnalǵan qoıyn kitap. Kitapqa Elbasynyń birlik, adamgershilik, qazaqstandyq patrıotızm, memleket, jahandaný, saıasat pen ekonomıka, órkenıet pen mádenıet týraly tańdamaly naqyl sózderi men oı tolǵanystary toptastyrylǵan.

Qoıyn kitap úlgisinde úsh tilde qatar jaryq kórip otyrǵan jınaq «Qazaqstan 2050» strategııasyn júzege asyrý barysynda jastarǵa baǵyt beretin baǵdarshy bolmaq.

Shara sheńberinde N. Nazarbaevtyń «Oı bólistim halqymmen» atty aýdıokitabynyń AppStore, Play Market jáne Marketplace-qa arnalǵan elektrondyq qosymshalarynyń da tusaýy kesiledi. Budan bylaı atalmysh týyndylar ınternet-dúkender arqyly barsha qazaqstandyqtarǵa qoljetimdi bolady.

Tusaýkeser rásiminde jastardyń Elbasy Nursultan Nazarbaevqa joldaǵan beınehaty kórsetiledi. «Bolashaq» baǵdarlamasynyń túlekteri men mektep oqýshylaryna Elbasynyń qoltańbasy qoıylyp, tilegi jazylǵan kitaptar tabystalady.

Budan keıin jınalǵan jurt «Úlken saıasattaǵy rııasyz kezdesýler» atty derekti fılmdi tamashalaıdy.