Nazarbaev Ortalyǵynda balalar úılerindegi tárbıelenýshilerdiń óner kórmesi ashyldy
ASTANA. 7 maýsym. QazAqparat - Nazarbaev Ortalyǵynda «Bolashaq» qaıyrymdylyq qory «Meniń aınalamdaǵy álemim - meniń shyǵarmashylyq ómirim» atty II respýblıkalyq kórkemsýret týyndylary arasynda ótken baıqaý máresine jetti.
Saltanatty sharaǵa «Bolashaq» qaýymdastyǵy keńesiniń tóraǵasy Baýyrjan Baıbek pen Nazarbaev Ortalyǵy dırektorynyń orynbasary Leıla Mahat qatysyp, jeńimpazdar men júldegerlerdi marapattady. Balalar úılerindegi tárbıelenýshilerdiń arasynda ótken bıylǵy baıqaýǵa 200-ge tarta úmitker qatysty. Eldiń ár túkpirinen kelgen avtorlar qazylar alqasyna matadan, aǵashtan, metaldan jasalǵan óz buıymdaryn usynǵan bolatyn. Búgin balalardyń qolynan shyqqan bul buıymdar qaıyrymdylyq vernısajǵa qoıyldy. Uıymdastyrýshylardyń aıtýynsha, aýktsıon barysynda ónerli órenderdiń týyndylarynan túsken tabys balalardyń ózderine beriledi. Vernısaj Nazarbaev Ortalyǵynda 11 maýsymǵa deıin jalǵasady.
Sonymen qatar baıqaýda kózge túsken balǵyndarǵa ónerdiń dańǵyl jolyna shyǵýǵa da úlken qoldaý kórsetiledi. Máselen, byltyr baıqaýdyń 3 jeńimpazy Qazaq ulttyq óner ýnıversıtetine oqýǵa shaqyrylǵan bolatyn.
Aıta keteıik, baıqaýdyń basty maqsaty - balalar úıleri men ınternattarynda tárbıelenip júrgen talantty jastardy anyqtap, olarǵa qoldaý kórsetý bolyp tabylady. Osy oraıda, «Bolashaq» qory «Qulanshy» qazirgi zamanǵy Óner ortalyǵy men «ıÝNESKO» balalar kórkemsýret mektebiniń qoldaýymen 2010 jyldan beri balalar úılerindegi ónerli tárbıelenýshilerdi yntalandyrýdy dástúrge aınaldyrǵan.
