Nazarbaev Ortalyǵy murajaıynda «Saq kóseminiń qorǵany» jańa biregeı zaly ashyldy

«Qazaq halqy - baǵzy zamannan ózimen birge jasap kele jatqan baıtaq tarıhy bar el. Biraq, neshetúrli sumdyqtarǵa dýshar bolǵan, san alýan qyrǵynǵa kezdesken zamandar shashyrap ketken tarıhymyzdy jınaýdyń, táptishteýdiń ýaqyty táýelsizdik alǵannan keıin týdy. Biz qazir halqymyzdyń tarıhyn tirnektep jınap júrmiz», - dep atap ótti zaldyń ashylý rásiminde fılologııa ǵylymynyń doktory, professor Myrzataı Joldasbekov.

«Saq kóseminiń qorǵany» ekspozıtsııalyq zaly ataqty Berel qazbalarynyń arheologııalyq zertteýiniń nátıjesi bolyp tabylady. Bereldik qazbalar - elimizdiń mádenı jáne ǵylymı ómirindegi aıtýly oqıǵa.

Nazarbaev Ortalyǵynyń arnaıy jasaqtalǵan zalyna er adam men áıel adamnyń sarkofagy, úsh jylqynyń qańqasy, jylqynyń ábzeldengen jabdyǵynyń rekonstrýktsııasy men jekelegen buıymdarynyń túpnusqasy qoıyldy. Barlyǵy - 40 eksponat.

Berel qorymyndaǵy iri obalardyń birine (№11 oba) Á.H. Marǵulan atyndaǵy arheologııa ınstıtýtynyń halyqaralyq arheologııalyq ekspedıtsııasy qazba jumystaryn júrgizdi. Reseı, Italııa, Frantsııa memleketterinen mamandar arnaıy shaqyryldy. Ekspedıtsııaǵa Berel obalaryn tapqan qazaqtyń belgili arheology Zaınolla Samashev jetekshilik etti. Qaıtalanbas ári asa qundy qazbalardy qaıta qalpyna keltirý jumystarymen sýretshi-jańǵyrtýshy Qyrym Altynbekov aınalysty.

Shara barysynda Berel qorǵanyndaǵy qazba jumystary kezinde túsirilgen derekti fılm usynyldy.