Nazarbaev ortalyǵy men Ózbekstannyń Islam órkenıeti ortalyǵy yntymaqtastyq memorandýmyna qol qoıdy
NUR-SULTAN. QazAqparat - Tashkentte Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵynyń basqarma tóraǵasy Bolat Sársenbaev pen Ózbekstan Mınıstrler Kabıneti janyndaǵy Islam órkenıeti ortalyǵynyń dırektory Shoazım Mınovarov ózara yntymaqtastyq týraly memorandýmǵa qol qoıyldy, dep habarlaıdy QazAqparat tilshisi.
«Memorandýmnyń maqsaty - órkenıetaralyq jáne konfessııaaralyq dıalog salasyndaǵy ortaq jobalardy júzege asyrý, toleranttylyq pen kelisim qaǵıdattaryn damytý. Taraptar dinaralyq dıalogty damytýdaǵy ózara tájirıbe almasý, sondaı-aq eki memleket aýmaǵynda osy baǵyttaǵy kezdesýler, is-sharalar, forýmdar men sammıtter uıymdastyrý máselesi boıynsha kelisimge keldi. Eki tarap ta álemniń turaqty damýynyń irgeli sharty ártúrli konfessııalar, etnostar men mádenıetter arasyndaǵy dıalog, syılastyq pen dostyq ekenin alǵa tartty», - delingen N.Nazarbaev ortalyǵy taratqan aqparatta.
N.Nazarbaev ortalyǵynyń basshysy Bolat Sársenbaev dinı jáne ǵylymı sarapshylar qaýymdastyǵynyń túrli konfessııalyq qatynastary salasyndaǵy irgeli, qoldanbaly zertteý jobalaryn damytýdaǵy róliniń ósip kele jatqandyǵyn, dinder arasyndaǵy toleranttylyqty nyǵaıtý, sondaı-aq eki baýyrlas el arasyndaǵy yntymaqtastyqty keńeıtý boıynsha tájirıbe almasýdyń mańyzdylyǵyn atap ótti.
Sonymen qatar, Bolat Sársenbaev 2022 jyly ótetin Álemdik jáne dástúrli dinder kóshbasshylarynyń sezi men 2021 jyly ótetin sezdiń XIX hatshylyq otyrysyna QR Parlamenti Senatynyń tóraǵasy - Álemdik jáne dástúrli dinder lıderleri sezi hatshylyǵynyń jetekshisi Máýlen Áshimbaevtyń basshylyǵymen, QR Aqparat jáne qoǵamdyq damý, Syrtqy ister mınıstrlikteriniń qoldaýymen daıyndyq bastalǵanyna erekshe nazar aýdardy.
«Ózderińiz biletindeı, Ózbekstan – bizdiń memleketimizdiń mańyzdy seriktesteriniń biri ǵana emes, bizge dos, baýyrlas memleket. Qazaqstan rýhanı bilim berý, dinaralyq dıalogty ilgeriletý, eki el arasyndaǵy tájirıbe almasý salasyndaǵy tereń yntymaqtastyqqa erekshe mán beredi. Osy oraıda, QR Prezıdenti Qasym-Jomart Toqaevtyń konfessııalar men órkenıetter arasyndaǵy dıalogty qamtamasyz etýdegi, halyqtar arasyndaǵy beıbitshilik pen kelisimniń tıimdi strategııasyn ázirleýdegi rólin atap ótý mańyzdy. Sondaı-aq, QR Tuńǵysh Prezıdenti - Elbasy Nursultan Nazarbaevtyń bastamasymen ótetin Álemdik jáne dástúrli dinder lıderleri sezin jan-jaqty qoldaǵany úshin rızamyz. Osy jyldar ishinde sezd jumysy ártúrli konfessııa ókilderiniń ózekti máselelerin sheshýge baǵyttalǵan tıimdi quralǵa aınalyp úlgerdi. Ózge elder men órkenıetter arasyndaǵy yntymaqtastyqty damytýdaǵy jemisti jumysynyń arqasynda Álemdik jáne dástúrli dinder lıderleriniń sezi shynymen de Qazaqstannyń tanymal sımvoly mártebesine ıe boldy. Álemdik jáne dástúrli dinder lıderleri seziniń ıdeıalaryn ilgeriletý jáne ony dıalogtyń jańa deńgeıine shyǵarý jumystaryn birlesip jalǵastyrý mańyzdy dep sanaımyn. Tek yntymaqtastyq, baýyrmaldyq qasıetteri ǵana bizge búkil álemdik qoǵamdastyqtyń ál-aýqatyn jaqsartý men ortaq maqsattarǵa jetýge múmkindik beredi», - dedi N.Nazarbaev ortalyǵynyń basshysy.
Bolat Sársenbaev Ózbekstanǵa jumys sapary barysynda Ózbekstan musylmandary basqarmasynyń tóraǵasy, múftı Ý.Alımovpen, Ózbekstan Syrtqy ister mınıstriniń birinshi orynbasary F.Arzıevpen, Palestına memleketiniń Ózbekstandaǵy Tótenshe jáne Ókiletti Elshisi Mohammad Tarshahanımen kezdesti.
