Nazarbaev Mırzıeevti Ózbekstan Prezıdenti bolyp saılanýymen quttyqtady
ASTANA. QazAqparat - Memleket basshysy Nursultan Nazarbaev Shavkat Mırzıeevke Ózbekstan Respýblıkasynyń Prezıdenti bolyp saılanýyna baılanysty quttyqtaý jedelhatyn joldady.
Bul týraly Aqordanyń baspasóz qyzmetinen habarlady.
Quttyqtaýda Qazaqstan Prezıdenti ótken saılaý nátıjesi azamattardyń ál-aýqatyn jáne memlekettiń halyqaralyq arenadaǵy bedelin odan ári arttyrýǵa baǵyttalǵan saıasatqa degen Ózbekstan halqynyń joǵary senimi men qoldaýynyń aıǵaǵy bolǵanyn atap ótti.
«Sizdiń basshylyǵyńyzben baýyrlas Ózbekstanda turaqtylyq pen qaýipsizdikti nyǵaıta túsetin aýqymdy ózgerister jalǵasyn tabatynyna senimdimin», - delingen jedelhatta.
Memleket basshysy birlesken kúsh-jigerdiń arqasynda Qazaqstan men Ózbekstan arasyndaǵy strategııalyq seriktestikti damytýǵa, sondaı-aq Ortalyq Azııadaǵy barlyq elderdiń yntymaqtastyǵyn keńeıtýge tyń serpin beriletinine senim bildirdi.
Elbasy ekijaqty jáne óńiraralyq ózara is-qımyldyń áleýeti zor ekenine toqtaldy, sondaı-aq elimizdiń saıası, saýda-ekonomıkalyq jáne mádenı-gýmanıtarlyq salalarda syndarly dıalog júrgizýge ázir ekenine nazar aýdardy.
«Osy sátti paıdalana otyryp, suhbatymyzdy Astanada jalǵastyrý úshin ózińizge yńǵaıly ýaqytta Qazaqstanǵa memlekettik saparmen kelýdi usynamyn», - delingen jedelhatta.
Sońynda Nursultan Nazarbaev Sh.Mırzıeevke zor densaýlyq, memlekettik qyzmette jańa jetistikter, al baýyrlas ózbek halqyna beıbitshilik pen baq-bereke tiledi.
