Nazarbaev mınıstrlikterde qarajattyń ıgerilý tıimdiligin tekserýdi tapsyrdy
ASTANA. QazAqparat - Qazaqstan halqyna bıylǵy Joldaýynda bıýdjet shyǵystarynyń tıimdiligin túbegeıli arttyrý qajettigin aıtqan Nursultan Nazarbaev, mınıstrlikterdiń qarajatty ıgerýiniń tıimdiligin tekserýdi tapsyrdy, dep habarlaıdy QazAqparat.
«Biz 2017 jyly memlekettik damý baǵdarlamalaryn qajetti resýrstarmen tolyqtaı qamtamasyz ettik. Mınıstrlikter men vedomstvolardyń qarajatty ıgerýiniń tıimdiligin tekserý qajet.
Respýblıkalyq bıýdjettiń 40%-dan astamyn quraıtyn Densaýlyq saqtaý, Eńbek jáne halyqty áleýmettik qorǵaý, Bilim jáne ǵylym mınıstrlikterinen bastaý kerek. Onyń qorytyndysy boıynsha maǵan baıandalsyn», - dedi Elbasy.
Prezıdent atap ótkendeı, tıimsiz baǵdarlamalardyń qarajatyn Úshinshi jańǵyrtý mindetterin iske asyrýdy qamtamasyz etetin baǵdarlamalarǵa qaıta bólý qajet. Sondaı-aq, qarajatty naqty ekonomıkaǵa neǵurlym tezirek ári tıimdirek jetkizý úshin bıýdjettik rásimderdi jeńildetken jón.
«Biz fıskaldyq ortalyqsyzdandyrý saıasatyn jalǵastyrýymyz kerek. Ótken jyldarda ortalyqtan jergilikti jerlerge kóptegen fýnktsııalar men ókilettikter berildi. Endi olardyń jetkilikti qarjylyq derbestigin bekemdeı túsý qajet. Sonymen birge, qarjy shyǵysy jónindegi ókilettikterdiń oblystyq deńgeıde shoǵyrlanýyna jol bermeý mańyzdy. Olardy ári qaraı aýdandyq jáne aýyldyq jerlerge berý kerek. Ákimder óńirlik jáne jergilikti mańyzy bar máselerdi sheshýge tıis, al Úkimet jalpymemlekettik máselelerge den qoıýy qajet», - dedi N.Nazarbaev.
