Nazarbaev mınıstr Dúısenovaǵa: Tamara, jumystan sharshadyń ba

ASTANA. QazAqparat - Úkimettiń keńeıtilgen otyrysynda Memleket basshysy Nursultan Nazarbaev medıtsınalyq saqtandyrý máselesin kóterdi, dep xabarlaıdy QazAqparat tilshisi.

«Bizge mindetti áleýmettik medıtsınalyq saqtandyrýdy keıinge shegerýge týra keldi. Sebebi ózin-ózi jumyspen qamtyp júrgen azamattardy zańdastyryp, resmı túrde tirkeý kerek. Olar salyq tólemeıdi, zeınetaqy júıesine qatyspaıdy. Bylaısha aıtqanda, «kóleńkede» júr. Men osyny bes jyl boıy aıtyp kelemin. Naqty tapsyrmalar da berdim. Alaıda ol azamattarmen eshkim tyǵyz aınalysyp jatqan joq. Mınıstr Dúısenovaǵa (Eńbek jáne halyqty áleýmettik qorǵaý mınıstri - avt.) da talaı ret aıttym. Ne boldy? Tamara, al aıtshy? Álde sharshadyń ba myna jumystan?», - dedi N.Nazarbaev.

Tamara Dúısenovanyń aıtýynsha, osy ýaqytqa deıin ózin-ózi jumyspen qamtyp júrgenderdi anyqtaý jumysy atqaryldy. Qazaqstanda 2,7 mln adamnyń naqty áleýmettik mártebesi joq bolyp shyqty. Olardyń ishinde jumyssyzdar da bar. Al ózin-ózi jumyspen qamtyp júrgenderdiń ishinde tirkeýge turmaǵan kásipkerler men jaldamaly jumysshylardy zańdastyrý qajet.

«Eń birinshi, «ózin-ózi jumyspen qamtyp júrgen azamattar» degen kimder? Osyny anyqtap, zańǵa engizý kerek. Sebebi árkim árqalaı túsinedi. Sonyń naqty anyqtamasyn berý kerek», -  dep atap kórsetti T.Dúısenova.

Mınıstrdiń sózine qaraǵanda, sońǵy bes jyldyń ishinde jumyspen qamtý baǵdarlamalary aıasynda 500 myń adam jumysqa turyp, áleýmettik jarnalaryn tólep jatyr. Alaıda búginde «kóleńkede júrgen» kásipkerlerdi zańdastyrý qıynǵa soǵyp jatyr. Sebebi Salyq kodeksinde «700 myń teńgeden tómen tabysy bar kásipkerlerge tirkeýge turý mindetti emes» degen norma bar. Osyǵan baılanysty ózin-ózi jumyspen qamtyp júrgen kásipkerlerdi tirkeýdiń ózge tártibi ázirlenip jatyr.