Nazarbaev: Men úshin kadrlardy tańdaý - eń qıyny
ASTANA. QazAqparat - Búgin otandyq jáne halyqaralyq BAQ ókilderimen kezdesý kezinde Qazaqstan Prezıdenti Nursultan Nazarbaev «Aıqyn» gazetiniń bas redaktory Nurtóre Júsiptiń kadrlardy tańdaý, olarǵa senim artý týraly qoıǵan suraǵyna jaýap berdi.
Jýrnalıst Nurtóre Baıtilesuly QR Prezıdentinen: «Sizdiń quzyretińizde sheshim qabyldaý degen másele bar. Keıbireýdi taǵaıyndaısyz, keıbireýdi alasyz. Sol alǵan kezde olardyń senimińizden shyqpaı qalǵany sizdiń janyńyzǵa bata ma?» - dep surady.
Oǵan Elbasy sheshenderden qalǵan ataly sózdi mysal ete otyryp jaýap berdi:
- Batady. Baıaǵyda Buqar jyraýdan suraǵan eken ǵoı, siz úshin eń qıyn nárse ne boldy bul dúnıede dep. Sonda ol: «Kósh bastaý qıyn emes, qonatyn kól bolsa; qol bastaý qıyn emes, qol bastaıtyn er bolsa, dúnıedegi eń qıyn nárse - el aldyna shyǵyp sóz bastaý», - degen eken. Sol sııaqty men úshin de, basqalary úshin de kadrlardy tańdaý - eń qıyny.
Buǵan deıin habarlaǵanymyzdaı, Kezdesýge qatysýshylar «Qazaqstannyń úshinshi jańǵyrýy: jahandyq básekege qabilettilik» atty joldaýdy iske asyrý aıasynda el ekonomıkasyn transformatsııalaý úderisiniń birqatar aspektilerin, sybaılas jemqorlyqqa qarsy kúres máselelerin, qazirgi saıası jańǵyrý kezeńiniń erekshelikterin, BUU Qaýipsizdik keńesiniń turaqty emes múshesi retindegi Qazaqstannyń syrtqy saıası basymdyqtaryn, sondaı-aq basqa da mańyzdy jaıttardy talqylady.
Kezdesýge «Qazaqstan», «Habar», «MIR» telearnalarynyń, «Aıqyn» gazetiniń, «Esquire» jýrnalynyń, «Qazaqparat» aqparat agenttiginiń jýrnalısteri qatysty.
