Ustazyn balaǵattaǵan Nazarbaev mektebiniń oqýshysy oqý ornynan shyǵaryldy

ALMATY. KAZINFORM – Áleýmettik jelide qyzý talqylanǵan NZM oqýshysynyń muǵalimdi balaǵattaý oqıǵasyna baılanysty «Nazarbaev Zııatkerlik mektepteri» DBBU Basqarma tóraǵasy Ánýar Janǵozın resmı málimdeme jasady.

Onyń aıtýynsha, Almaty qalasyndaǵy Nazarbaev Zııatkerlik mektebinde bolǵan jaǵdaıǵa baılanysty oqýshymen, ata-analarmen jáne pedagogıkalyq ujymmen kezdesý ótken. Talqylaýǵa Oqý-aǵartý mınıstrliginiń ókilderi, óńirlik bala quqyqtary jónindegi ýákil men qoǵamdyq keńestiń músheleri de qatysqan.

- Kezdesý barysynda buǵan deıin qabyldanǵan sheshim qaıta qaralyp, taraptar ózara túsinistikke keldi. Nazarbaev Zııatkerlik mektebi óz sheshimin ózgertpeıdi, oqýshy mektepten shyǵarylyp, memlekettik jalpy bilim beretin mektepke aýystyryldy. Oqýshynyń ata-anasy tarapynan eshqandaı qarsylyq joq. Nazarbaev Zııatkerlik mektepteri shákirtterge árdaıym qurmetpen qarap, qoldaý kórsetýdi jáne ózara syılastyqqa negizdelgen syndarly qarym-qatynasty basty qaǵıda retinde ustanady, – dedi Ánýar Janǵozın.

Oqý-aǵartý mınıstriniń baspasóz qyzmeti de bolǵan jaǵdaı jan-jaqty zerdelenip, balanyń ári qaraı bilim alý joldary qarastyrylǵanyn habarlady.

- Bul rette sheshim zańnama talaptaryna saı, balanyń quqyqtary men múddelerin, onyń ishinde tolyqqandy bilim alý quqyǵyn eskere otyryp qabyldandy, – delingen vedomstvo málimdemesinde.

Aıta keteıik, Nazarbaev Zııatkerlik mektebiniń 11-synyp oqýshysy emtıhan kezinde telefonmen ustalyp qalǵan. Telefonyn alyp qoıǵan muǵalimge balaǵat sóz aıtqan. Mekteptiń pedagogıkalyq keńesi oqýshyny bilim ordasynan shyǵarý týraly sheshim qabyldady. Bul oqıǵa qoǵamda qyzý talqylandy. Máselege Oqý-aǵartý mınıstrligi aralasyp, Almaty qalasyna Balalardyń quqyqtaryn qorǵaý komıtetiniń tóraǵasy shuǵyl túrde issaparmen keldi.

Buǵan deıin Almatyda 670 túlek «Altyn belgige» úmitker ekenin jazǵanbyz.