Nazarbaev Qytaımen qarym-qatynas týraly: Tarıh bizden bastalǵan joq, bizben aıaqtalmaıdy

ASTANA. QazAqparat - Memleket basshysy Nursultan Nazarbaev otandyq BAQ ókilderine bergen suhbatynda Qazaqstan men Qytaıdyń qazirgi qarym-qatynasy týraly pikir bildirdi, dep habarlaıdy QazAqparat tilshisi.

Prezıdent Qazaqstanǵa jumys isteýge kelgen Qytaı azamattarynan qoryqpaý qajettigin aıtty.

«Qytaı men Qazaqstannyń qazirgi qarym-qatynasy joǵary deńgeıde. Odan qorqatyn eshteńe joq. Tarıh bizden bastalǵan joq, bizben aıaqtalmaıdy. Myń jyldan astam tarıhymyzda qansha adamdar, qansha ulttar quryp, joǵalyp, sińip ketkenderi tolyp jatyr. «Qara qytaı qaptasa, sary orys naǵashyńdaı bolady» degen maqal bar. Ony aıtyp jatqandary durys emes. Men osynda ne qarap otyrmyn sony qaramaı? Jappaı bizge kelip jatqany, qaptap jatqany, basyp jatqany joq. Onyń barlyǵy zańmen, kelissózben kelisilgen. Óndiris salatyn bolsa, mysaly bizde joq mamandar - 500 adam keledi, tizim beremiz. Zaýyt bitken soń, 500 adam qaıtady. Ol kelisilgen másele, bir adam da qalmaıdy», - dedi Prezıdent.

Sonymen birge, Prezıdent 200 mln-nan astam qytaıdyń basqa elderde turatynyn, kóptegen qalalarda chaınataýn bar ekenin atap ótip, Qazaqstanda ondaı aýdandardyń joq ekenin aıtty.

«Qazir Qytaı - Amerıkadan keıingi ekinshi oryndaǵy óte myqty órkendep ósip kele jatqan el. Tehnologııa men tehnıkasyn birge alyp kele jatyr. Aqparattyq tehnologııa, jasandy ıntellekt, kompıýterlik tehnologııalar - barlyq jaǵynan Qytaı ozyp ketpese, birdeı kele jatyr. Sondyqtan, olarǵa jasap jatqan qysymnyń barlyǵy - sony ary qaraı boldyrmaý úshin, bir jaǵy seskengennen», - dedi ol.

Elbasy Batysqa shyǵatyn joldyń Reseı arqyly, shyǵysqa jol - Qytaı arqyly júretinin eske salyp, kórshiles eldermen barynsha tyǵyz qarym-qarynas ornatý qajettigin basa aıtty.

«Sondyqtan, biz qoldan kelgenshe, Sı Tszınpın myrzanyń «Bir beldeý - bir jolyn» qoldap otyrmyz. Ol bizdiń «Nurly jol», «Jańa Jibek jolynyń» jalǵasy bolyp sanalady. Sonyń arqasynda barlyq ınfraqurylymdy jasap jatyrmyz. 60-qa jýyq jańa óndiris oryndaryn Qazaqstanda salýdy aıttym. Jaı emes, búgingi zamanǵa saı óndiris bolýy kerek. Olardyń eskisin alaıyn dep otyrǵan joqpyz. Sodan keıin bizdiń jastarymyzdyń Qytaıda oqý máselesi. Qarym-qatynas bolǵandyqtan, aǵylshyn tilinen keıin jastarǵa Qytaı tilin bilý kerek. Ashyǵynan, shynymen aıtqanda eshqandaı qaýip joq dep sanaımyn. Kerisinshe, jumysymyzdy kóbeıtýimiz kerek. Qytaımen qarym-qatynasty nyǵaıtamyz, kórshilik jaǵdaıymyzdy túzeı beremiz. Integratsııany júrgize beremiz», - dep óz sózin túıindedi Nursultan Nazarbaev.