Nazarbaev: Qytaı halyqaralyq kooperatsııany yntalandyrýdyń jańa draıveri boldy
BEIJІŃ. QazAqparat - Qytaı «Bir beldeý, bir jol» bastamasyn kóterip, halyqaralyq kooperatsııany yntalandyrý jónindegi mindetti moınyna aldy. Bul týraly búgin «Bir beldeý, bir jol» atty joǵary deńgeıdegi forým kóshbasshylarynyń dóńgelek ústelinde Qazaqstan Prezıdenti Nursultan Nazarbaev habarlady, dedi Qytaıdaǵy «QazAqparat» HAA menshikti tilshisi.
«Biz qazir bul aǵymdaǵy júzjyldyqtan bastap kúsheıip kele jatqan álemdegi saıası ekonomıkalyq jáne gýmanıtarlyq daǵdarysqa der kezinde berilgen jaýap ekenin kórip otyrmyz. Paternalızm, saıası dáleldi sanktsııalar qoldaný mıllıondaǵan halyqtyń ómiriniń ekonomıkalyq belsendiligin álsiretip jiberdi. Nátıjesin sońǵy jyldardaǵy álemdik ekonomıka men saýda-sattyqtyń tómendep, baıaýlaýynan baıqaýǵa bolady. Osy jaǵdaıda álem halyqaralyq kooperatsııany yntalandyrýdyń jańa draıverine óte muqtaj boldy, bul róldi ózine naryqtardy damytýdyń jańa biriktirilgen bastamasymen Qytaı aldy», - dedi Memleket basshysy.
Onyń aıtýynsha, «Bir beldeý, bir jol» bastamasy jańa geoekonomıkalyq paradıgmany qalyptastyrady. Ony sátti iske asyrý 4,5 mlrd jıyntyq halyqpen osy joldaǵy elderge paıda ákeledi, Qytaı Halyq Respýblıkasy úshin naryq ashady.
«Birinshiden, «Bir beldeý, bir jol» bastamasymen Qytaı álemge óńirlik kooperatsııanyń jańa úlgisin kórsetti.
«Birlesip damý arqyly turaqtylyqqa» degen ustanymdy kózdeıtin bul jarııalanǵan tásil ondaǵan memleketterdiń ekonomıkalyq múddelerimen úndesetin halyqaralyq yntymaqtastyqtyń tartymdy úlgisi. Osyǵan baılanysty qazir Jibek jolynyń belgili bir jıegi kóringende, bul makroóńirlik kooperatsııany birlesip strategııalyq turǵydan úılestirý qajet, forýmnyń róli de osyny qamtıdy», - dep atap ótti N. Nazarbaev.
Ekinshiden, - dep sózin jalǵastyrdy Elbasy. Jibek jolynyń bastamalaryn iske asyrý tutas óńirlerdi, onyń ishinde jahandyq kontekste Qazaqstan da kiretin Ortalyq Azııany jańadan jaıǵastyrýǵa yqpal etedi.
«Bizdiń geografııa bizge ortaq paıda ákeledi. Ortalyq Azııa, júz jyl burynǵy óziniń altyn kezeńi sııaqty qazir de iri naryqtar arasynda basty kópirge aınalyp, qaıtadan strategııalyq mánge ıe boldy. Ár jyl saıyn Tynyq muhıtynan Atlantıkaǵa deıin barlyq jańa jáne jyldam marshrýttar ıgerilýde, sonyń arqasynda Eýrazııanyń ózinde ǵana saýda kólemi 2020 jyly 1,2 trıllıonǵa artpaq. Iran, Aýǵanstan jáne odan ári Taıaý shyǵys pen Ońtústik Azııa naryqtaryna shyǵý múmkindikteri júzege asyrylýda», - dedi Prezıdent.
Eske salsaq, N. Nazarbaev «Bir beldeý, bir jol» forýmyna qatysýmen, QHR-da ekikúndik resmı issaparda júr.
