Nazarbaev Kvettada bolǵan terrorlyq aktige baılanysty Pákistan halqyna kóńil aıtty
ASTANA. QazAqparat - Memleket basshysy Nursultan Nazarbaev Pákistan Islam Respýblıkasynyń Prezıdenti Mamnýn Hýseınge Kvetta qalasynda bolǵan terrorlyq aktige baılanysty kóńil aıtý jedelhatyn joldady.
Bul týraly Aqordanyń baspasóz qyzmetinen habarlady.
Elbasy terrorlyq akt saldarynan kóptegen jazyqsyz adamdardyń qaza bolǵany týraly habardy zor kúızelispen qabyldady.
«Qazaqstan terrorızmniń kez kelgen túrin qatań aıyptaıdy. Qandaı maqsatta bolsa da, jazyqsyz qan tógýdi aqtaýǵa bolmaıdy. Zamanaýı syn-qaterler órship turǵan almaǵaıyp zamanda biz Pákistanmen birge halyqaralyq qaýipsizdik pen turaqtylyqty qamtamasyz etý úshin kúsh jumyldyrýǵa daıynbyz», - delingen jedelhatta.
Nursultan Nazarbaev Qazaqstan halqynyń jáne jeke óziniń atynan Pákistan halqyna kóńil aıtyp, qaza bolǵandardyń otbasylary men jaqyndaryna sabyrlylyq tiledi, sondaı-aq jaraqattanǵandardyń tezirek saýyǵyp ketýine nıettestigin bildirdi.
