Nazarbaev QR-daǵy kún energııasynyń qolaıly ózindik qunyn atady
ÁBÝ-DABI. QazAqparat - BAÁ-degi «Bolashaq energııasy» Dúnıejúzilik Sammıtinde Prezıdent Nursultan Nazarbaev QR-daǵy kún energııasynyń yqtımal ózindik qunyn atady, dep habarlady «QazAqparat» HAA tilshisi.
«Búgin jańa energııa kózderi barynsha qoljetimdi bola bastady. Muny tıimdi paıdalaný qajet. Buryn tek damyǵan elderde ǵana mundaı múmkindik boldy. Olar jańa energotehnologııa salasynda bilim men tehnıkalyq tájirıbe jınaqtady. Damýshy elderdiń osy úderiske qosylatyn shaǵynyń der kezi. Mysaly, Qazaqstan úshin búginde kún energııasyn óńdeý kıllovat-saǵatyna ózindik quny 10 tsent bolǵanda múmkin bolady», - dedi memleket basshysy.
Onyń aıtýynsha, Germanııa 15 jyl buryn kıllovat-saǵatyna 70 tsentten bastaǵan. Jel energııasy jyl saıyn 2,5 paıyzǵa arzandaıdy. Sońǵy 15 jylda ol úsh esege arzandady.
«Búginde jel energııasy kıllovat-saǵatyna 4-5 tsent turady. Energetıkalyq trendterdiń kólikke yqpal etý dárejesin atap ótken jón. Oǵan otyndy álemdik tutynýdyń 70 paıyzǵa jýyǵy jáne kómirqyshqyldy gaz shyǵaryndylarynyń basym bóligi - jyl saıyn 35 mıllıard tonnadan astamy keledi. Jasyl tehnologııa kóshbasshylardyń aýysýyna jáne álemdik avto ónerkásibinde jańa jarysqa yqpal etedi», - dep sózin jalǵady Nazarbaev.
Ol elektromobılder búgin suranysqa ıe jáne qoljetimdi bola túsýde. Boljam boıynsha, elektr mashınalardyń úlesi 2020 jyly 1 paıyz, 2030 jyly 30 paıyzǵa deıin artady. Álemniń kóptegen megapolısteri taza qoǵamdyq kólikke aýysady.
