Nazarbaev kitaphanasy men mýzeıine kirý talaby jeńildedi
ASTANA. QazAqparat - QR Tuńǵysh Prezıdenti - Elbasy kitaphanasy men Qazaqstan Respýblıkasy Tuńǵysh Prezıdentiniń Mýzeıi ǵımarattary týrısterdi shaqyrady, dep habarlaıdy QazAqparat tilshisi.
Kez kelgen tilek bildirýshi atalǵan ǵımarattardy tegin aralaı alady.
«Árıne, rejimdik nysan bolǵandyqtan, alǵashynda qıyndyqtar boldy. Biraq, barlyq memlekette mańyzdy nysandarǵa kirýge tekserý jumystary júredi jáne bul qalyptasqan zańdylyq. Budan bylaı, QR Tuńǵysh Prezıdenti - Elbasy kitaphanasy men Qazaqstan Respýblıkasy Tuńǵysh Prezıdentiniń Mýzeıi ǵımarattaryna kez kelgen qonaq kire alady. Kelýshilerdiń jeke kýálikterin tekserý talaby alynyp tastaldy. Sondaı-aq, olarǵa fotoapparat, beınekamera qurylǵylaryn alyp kirýge de ruqsat beriledi», - dedi QR Tuńǵysh Prezıdenti - Elbasy kitaphanasy dırektorynyń orynbasary Ámirhan Raqymjan Astana qalasynyń týrıstik fırma ókilderimen ótken kezdesýde.
Onyń aıtýynsha, kelýshiler qos ǵımaratty dúısenbiden ózge kúnderi tańǵy 10-nan keshki 18.00-ge deıin tegin aralaı alady. Saǵat saıyn gıdterdiń qatysýymen ekskýrsııa uıymdastyrylady.
«Elbasynyń Birinshi rezıdentsııasy oń jaǵalaýda ornalasqan. Onda Prezıdent 1997-2004 jyldary jumys istegen. Ózge ǵımarattardan ereksheligi sol, munda Nazarbaev qoldanǵan kabınet, qalamsap, telefon, kilem - barlyǵy ózgerissiz saqtalǵan. Sol jaǵalaýdaǵy Nazarbaev ortalyǵy 2013 jyly ashyldy. Bul biregeı ǵımaratty tanymal sáýletshi Norman Foster jobalaǵan. Mundaǵy 9 qabattyń 1, 2, 3 qabattary halyq nazaryna usynylady, odan joǵary qabattarda keńseler ornalasqan», - dep túsindirdi Ámirhan Raqymjan.
Dırektor orynbasarynyń aıtýynsha, qala kúni qarsańynda Nazarbaev ortalyǵynda «Nursultan Nazarbaev - jahandyq ıadrolyq qarýǵa qarsy qozǵalys kóshbasshysy» jáne «Álem moıyndaǵan kóshbasshy» taqyrybynda eki zal ashylady. Sońǵy úlgidegi tehnologııalarmen bezendirilgen bul zaldar merekedegi aıryqsha oqıǵalardyń biri bolmaq.
