Nazarbaev qazaqtyń memlekettiligin qaıta jandandyrǵan uly tulǵa retinde tarıhta qalady - Áshimbaev
«Demokratııalyq kúshterdiń jalpyulttyq koalıtsııasynyń búgingi otyrysy el tarıhyndaǵy asa mańyzdy kezeńde ótip otyr. Ózderińizge belgili, 19 naýryz kúni Qazaqstan Respýblıkasynyń Tuńǵysh Prezıdenti - Elbasy Nursultan Ábishuly Nazarbaev halyqqa úndeýin jarııalap, óziniń prezıdenttik ókilettigin toqtatatynyn málimdedi. Mundaı sheshimniń bir sátte qabyldanbaǵany barshamyzǵa túsinikti. Ol úshin Nursultan Ábishulynyń uzaq oılanyp, barlyq máselelerdi ábden saralap, salmaqtaǵany anyq. Elbasymyz qashanda el men halyqtyń múddesin birinshi kezekke qoıyp, árdaıym durys sheshimder qabyldaıtyny belgili», - dedi Máýlen Áshimbaev.
Sonymen qatar ol Qazaqstan halqy úshin Elbasynyń esimi qashanda memlekettilik, egemendik jáne Táýelsizdik sııaqty asa mańyzdy qundylyqtarmen bir qatarda turandyǵyn basa aıtty.
«Qazirdiń ózinde elimizdiń Tuńǵysh Prezıdentiniń esimi táýelsiz memleketimizdiń negizin qalaýshy, barlyq reformalardyń avtory, álemdik deńgeıdegi saıasatker tarıhymyzǵa altyn áriptermen jazylatyny sózsiz. Elbasy Qazaqstandy Keńes odaǵynyń artta qalǵan respýblıkalarynyń birinen zamanaýı, damyǵan, búkil álem biletin aldyńǵy qatarly memleketke aınaldyrdy. Elbasymyzdyń ekonomıkalyq jáne saıası reformalary men aýqymdy jańǵyrý baǵdarlamasy elimizdiń jan-jaqty damýyn qamtamasyz etti», - dedi ol.
Nur Otan partııasy Tóraǵasynyń birinshi orynbasary halyqtyń ál-aýqatynyń eselep ósýi de Nursultan Ábishulynyń eren eńbeginiń basty jetistikteriniń biri ekendigin atap ótti. Tuńǵysh Prezıdentimiz únemi halyqtyń ómir súrý sapasyn arttyrýǵa, jastar men kóp balaly otbasylardy qoldaýǵa, bilim berý men densaýlyq saqtaý salalaryn damytýǵa kóńil bólip, basty nazarda ustap keldigine nazar aýdartty.
«Qazirgi tańda búkil álem bizdiń elimizdi bitimgershilik bastamalary arqyly da óte jaqsy tanıdy. Qazaqstannyń astanasy eń ózekti jahandyq máselelerdi talqylap, oń sheshim shyǵaratyn halyqaralyq ortalyqqa da aınaldy. Sondyqtan Nursultan Ábishuly Nazarbaev Qazaqstan tarıhynda táýelsiz memlekettiń negizin qalaǵan, qazaqtyń memlekettiligin qaıta jandandyrǵan uly tulǵa retinde máńgi qalady. Sol sebepti, qazirgideı tarıhı kezeńde qazaqstandyq qoǵam birlikti tý etip, Elbasynyń strategııalyq saıasatynyń aıasynda ári qaraı birigýi tıis dep esepteımiz. Sondaı-aq qoǵamymyz Tuńǵysh Prezıdentimiz anyqtap bergen jolmen júrip, óziniń birtutastyǵyn jáne jetilgenin kórsetýi qajet», - dedi M.Áshimbaev.
