Nazarbaev qazaqstandyq jas ІT mamanyn Bıll Geıtske teńedi
ASTANA. QazAqparat - Respýblıkalyq jastar forýmynda Elbasy Nursultan Nazarbaev otandyq jas ınnovatsııa ázirleýshilerdi tanystyrdy, dep habarlaıdy QazAqparat.
Máselen, solardyń biri Sábıt Naýkenov elordadaǵy «Gift Sensor» kompanııasynyń negizin qalaǵan. Ol aǵymdaǵy jyly Sıngapýrda ótken eń iri azııalyq ІT-konferentsııasynda jeńimpaz bolǵan edi. Al oǵan deıin Nazarbaev ýnıversıtetindegi startap baıqaýynda da júldeger atanǵan.
«Iá, bizdiń jobamyz Sıngapýrda ótken «Echelon Asia Summit 2016» konferentsııasynyń iri baıqaýynda úzdik ondyqqa ilingen edi. Biz áleýmettik jelide, Internette kez kelgen aqparatty saraptaýǵa qabiletti jasandy ıtellekt ázirledik. Máselen, bizdiń algarıtm adamdy áleýmettik jelidegi profaıldary arqyly onyń eń jaqyn dosynan da jaqsy tanıdy jáne oǵan naqty unaıtyn syılyqty usynady. Shyndyǵyna kelgende bul «vaý»-tehnologııa», - dedi Naýkenov.
«Kórdińizder me, Bıll Geıtsten qaı jeri kem. Aıtyńyzdarshy. Esh qalys qalyp otyrǵan joq. Mine, bizde osynda talantty jastar, umtylys pen oı-pikir bar», - dep atap ótti óz kezeginde Qazaqstan Prezıdenti Nursultan Nazarbaev.
Aıta keterligi, forým barysynda Elbasy Qazaqstanda sońǵy 5 jyl ishinde jas ǵalymdar sany 60 paıyzǵa artqanyn aıtqan edi.
